नेकपा एसको संसदीय दलमा राजेन्द्र पाण्डे उपनेता, प्रमुख सचेतकमा प्रकाश ज्वाला

काठमाडौं । नेकपा एकीकृत समाजवादीको संसदीय दलको नेतामा माधवकुमार नेपाल सर्वसम्मत हुँदा उपनेतामा राजेन्द्र पाण्डे चयन भएका छन् ।

संसदीय दलको सोमवार बसेको बैठकले संसदीय राजनीतिका अनुभवी नेताहरूलाई पदाधिकारी चयन गरेको हो । पाण्डे उपनेता हुँदा प्रकाश ज्वाला प्रमुख सचेतक चयन भएका छन् ।

ज्वालाको संघीय संसदमा तेस्रोपटक जित हो भने यसअघि उनी प्रदेशसभा सदस्य भएका थिए । राष्ट्रिय पार्टी नभए पनि नेकपा एसले संसदीय दलको कार्यालय भने पाउनेछ । पार्टीका पदाधिकारीमध्ये अध्यक्ष माधव नेपालपछि उपाध्यक्षबाट राजेन्द्र पाण्डेमात्र सांसद निर्वाचित भएका छन् ।

महासचिव डा.बेदुराम भुसाल राष्ट्रियसभा सदस्य छन् भने उपमहासचिवमध्ये प्रकाश ज्वालाले मात्र चुनाव जितेका छन् ।