समानुपातिकतर्फ वागमतीबाट २९ सांसद, काठमाडौंबाट ८ जना पर्दा तीन जिल्ला शून्य (सूचीसहित)

धर्मेन्द्र दाहाल

२०७९ मंसिर २५ गते १४:०५

हेटौँडा । प्रतिनिधिसभाको समानुपातिकतर्फ कुल ११० सीटमध्ये वागमती प्रदेशबाट २९ जना परेका छन् । राष्ट्रिय पार्टी बनेका सातमध्ये ५ वटा दलले यस प्रदेशबाट उनीहरूलाई चयन गरेका हुन् ।

समानुपातिकबाट कांग्रेसले पाएको ३२ सीटमध्ये ९ जना प्रदेशबाट परेका छन् । एमालेबाट ७, माओवादीबाट ४, राष्ट्रिय स्वतन्त्र पार्टीबाट ५ र राप्रपाले ४ जनालाई पठाएको छ ।

राष्ट्रिय पार्टी भएका जनमत पार्टी, जनता समाजवादी पार्टीले भने यस प्रदेशबाट समानुपातिकमा प्रतिनिधित्व गराएका छैनन् ।

कुन जिल्लाको कति प्रतिनिधित्व ?

वागमतीका १३ जिल्लाबाट २९ जनाले समानुपातिकमा अवसर पाउँदा सीट बाँडफाँट भने सन्तुलित नदेखिएको टिप्पणी हुन थालेको छ । तीनवटा जिल्लाबाट शून्य प्रतिनिधित्व छ ।

सबैभन्दा धेरै काठमाडौंबाट ८ जनाले समानुपातिकमा अवसर पाएका छन् । यो सँगै काठमाडौंबाट मात्र १८ जना प्रतिनिधिसभा सांसद भएका छन् ।

त्यसैगरी अवसर प्राप्त गर्नेमा चितवन जिल्ला दोस्रो नम्बरमा परेको छ । चितवनबाट ५ जनाले समानुपातिकमा अवसर पाउँदा ललितपुर र नुवाकोटले ३-३ जना समानुपातिक सांसद पाएको छ । भक्तपुर, धादिङ, काभ्रे र सिन्धुलीले २-२ जना समानुपातिक सांसद पाउँदा दोलखा र सिन्धुपाल्चोकले १-१ जना समानुपातिक सांसद पाउन सफल बनेको छ ।

वागमतीको राजधानीसमेत रहेको मकवानपुरसहित मकवानपुरसँगै रामेछाप र रसुवा पनि समानुपातिक सांसदविहीन जिल्ला बने ।