लुम्बिनीका मुख्यमन्त्री भन्छन्ः जसले प्रचण्डलाई प्रधानमन्त्री बनाउँछ उसैसँग सहकार्य

रुपन्देही । नेकपा माओवादी केन्द्रका स्थायी कमिटी सदस्य तथा लुम्बिनी प्रदेश सरकारका मुख्यमन्त्री कुलप्रसाद केसीले माओवादीको समर्थनमा एमालेबाट केपी ओली र कांग्रेसबाट शेरबहादुर देउवा प्रधानमन्त्री बनेकाले अब प्रधानमन्त्री बन्ने पालो माओवादी अध्यक्ष प्रचण्डको भएको बताएका छन् ।

केसीले अब पार्टीले जसले प्रचण्डलाई प्रधानमन्त्री बनाउन तयार हुन्छ उसैलाई सरकार संचालनमा सहयोग गर्ने बताएका हुन् ।

‘अबको नयाँ सरकारको जुन दलले माओवादी केन्द्रका अध्यक्ष प्रचण्डलाई प्रधानमन्त्रीको प्रस्ताव एवं समर्थन गर्दछ सोही दलसँग नै गठबन्धन हुनुपर्छ’– दाङको भालुवाङमा पत्रकारहरुसँग कुरा गर्दै केसी भने ।

उनले निर्वाचन अगाडिको सहकार्यमा नेपाली कांग्रेस पनि इन्मारदारिता नभएकाले अब नयाँ सिराबाट सहकार्यको थालनी गर्नुपर्ने बताउँदै उनले अब माओवादीले प्रभानमन्त्रीको अडान नछाड्ने धारणा राखेका हुन् ।

नेपाली कांगे्रसबाट भर्खरै मात्रै प्रधानमन्त्री देउवालाई र यसभन्दा अगाडि एमालेका केपी शर्मा ओलीलाई पनि माओवादी केन्द्रको समर्थनमा प्रधानमन्त्री बनेकोले गर्दा अब यी दुवै दलले माओवादी केन्द्रका अध्यक्ष प्रचण्डलाई नै प्रधानमन्त्री स्वीकार्नु पर्ने वस्तुगत अवस्था रहेको उनको तर्क थियो ।

उनले भने –‘नेपालमा यदि परिर्वनका लागि सरकार निर्माण गर्ने हो भने प्रचण्ड नै हुनुहुन्छ उहाँलाई नै अगाडि माओवादी केन्द्रले सारेका छौं, जसले प्रचण्डलाई प्रधानमन्त्री स्वीकार्छ उही दलसँग सहकार्य हुनुपर्छ र हुन्छ ।’

सत्ता समीकरणको कोर्ष नयाँ दिशामा पुगेकोले अब गठबन्धनलाई पनि नयाँ कोर्षबाट अगाडि बढाउनु पर्ने उनले बताए। संघ सरकार प्रचण्डलाई प्रधामन्त्रीमा समर्थन गर्ने दलहरु मिलाएर लुम्बिनीमा पनि सरकारको निर्माण हुने केसीले बताए ।