भोजपुरमा प्रचण्डले भने- सुदनलाई रोजेको मन्त्रालय, राजेन्द्र फेरि मुख्यमन्त्री (भिडिओ)

भोजपुर । नेकपा माओवादी केन्द्रका अध्यक्ष पुष्पकमल दाहाल ‘प्रचण्डले, सुदन किरातीलाई रोजेको मन्त्रालय दिने आश्वासन दिएका छन् । किराती पूर्वमुख्यमन्त्री शेरधन राईविरुद्ध गठन्धनबाट प्रतिनिधिसभा उम्मेदवार छन् ।

जिल्लाको तिवारीभञ्ज्याङमा चुनावी सभालाई सम्बोधन गर्दै उनले गठबन्धनका उम्मेदवारहरूलाई अत्याधिक मतले जिताउन आग्रह गरे ।

‘अस्तिको पटक नै मैले मन्त्री बनाउन जोड गर्दा गर्दै सकिन यो पटक उहाँलाई रोजेको मन्त्रालय दिइन्छ । हेर्नुहोला पहिलोचोटि उहाँले रोजेको मन्त्रालय दिन्छु, अस्तिको ऋण तिर्न बाँकी छ सुदनलाई’, प्रचण्डले भने ।

उनले प्रदेश १ सभामा उम्मेदवार रहेका राजेन्द्रकुमार राईलाई फेरि पनि मुख्यमन्त्रीको सम्भावना रहेको बताए । प्रदेश २ का उम्मेदवार कांग्रेसका जिल्ला सभापति विनोद बान्तवालाई पनि देउवालाई भनेर पुरस्कृत गर्न प्रचण्डले सँगै गएका कांग्रेस प्रवक्ता प्रकाशशरण महतसमक्ष सिफारिस गरेका छन् ।

प्रचण्डले २००७ सालको क्रान्तिमा भोजपुरको भूमिका बिर्सन नसकिने बताए ।

उनले मंसिर ४ को निर्वाचन सामान्य नभएर जनमत संग्रहजत्तिकै भएको दोहोर्‍याए । ७० वर्षदेखि लडेर ल्याएका उपलब्धि खोस्ने षड्यन्त्र भएकाले त्यसका विरुद्ध गठबन्धन बनेको प्रचण्डको प्रष्टोक्ति थियो ।