संखुवासभामा वाईसीएलका केन्द्रीय सचिवसहित केही माओवादी नेता एमाले प्रवेश

विराटनगर । संखुवासभामा माओवादीको युवा संगठन वाईसीएलका केन्द्रीय सचिवसहित केही नेता कार्यकर्ता नेकपा एमाले प्रवेश गरेका छन् ।

आइतबार माओवादी केन्द्रका प्रदेश कमिटी सदस्यसमेत रहेका वाईसीएलका केन्द्रीय सचिव पृथक पाठकसहित माओवादीका जिल्ला र नगर कमिटीका नेता कार्यकर्ताहरू एमालेमा प्रवेश गरेका हुन् ।

मादीमा आयोजना गरेको चुनावी कार्यक्रममा उनीहरू एमाले प्रवेश गरेका हुन् । पार्टी प्रवेश गर्नेहरूमा माओवादीका जिल्ला सदस्य ग्याल्जेन शेर्पा, वाइसीएल जिल्ला सदस्य दीपेश खवास, मादी नगर कमिटी सदस्य शनकबहादुर विक, दावा लामा, प्रेम तामाङ, पासाङ शेर्पा र पासाङ ल्यामु शेर्पा छन् ।

उनीहरूलाई एमाले स्थायी कमिटी सदस्य तथा संखुवासभाका प्रतिनिधिसभा सदस्यका उम्मेदवार राजेन्द्र गौतम, प्रदेश २ का उम्मेदवार विदुर लिंथेपलगायतका नेताले प्रवेश गराएका हुन् ।