गोरखा आउँदा कता आएँ भन्ने भएको छैन: प्रचण्ड

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले गोरखा आफ्ना लागि परिचित जिल्ला भएको भन्दै आफूलाई कता आएँ भन्ने महसुस नभएको बताएका छन् ।

गोरखा २ मा उम्मेदवारी दर्तापछि सञ्चारकर्मीसँग बोल्दै प्रचण्डले अध्यापनदेखि जनयुद्धको तयारीसमेत गरेको ठाउँ भएकाले आफूलाई गोरखा सहज महसुस भएको बताए ।

उनले आधुनिक नेपाल निर्माणको हिसाबले गोरखा ऐतिहासिक जिल्ला भएको जिकिर गरे । ‘परिचित ठाउँ र परिचित जनताको बीचमा आएको महसुस भएको छ’, उनले भने, ‘मधेस, पहाड र हिमाल सबैमा पुगेर चुनाव लड्ने कीर्तिमान बनाए जस्तो भएको छ ।’

उनले उम्मेदवारी दर्तापछि मधेस, पहाड र हिमाल सबैमा पुगेर चुनाव लड्ने कीर्तिमान बनाएजस्तो लागेको बताए ।

‘सुरुमा रोल्पाबाट, त्यसपछि काठमाडौंबाट अनि मधेस हुँदा पछिल्लोपटक म चितवनबाट चुनाव लडेको थिएँ । अहिले फेरि गोरखा आइपुगेको छु । यसरी हेर्दा मधेस, पहाड, हिमाल सबै ठाउँमा पुगेर चुनाव लड्ने इतिहासमा म नै पहिलो हो कि जस्तो लागेको छ’, उनले भने।