बागमतीका ६ जिल्लामा नेकपा एसको विद्रोह, गठबन्धनविरुद्ध बेग्लै उम्मेदवार तयार

काठमाडौं । बागमती प्रदेशका पाँच जिल्लामा नेकपा एकीकृत समाजवादीको उम्मेदवारी शून्य भएपछि फरक रणनीतिका साथ अगाडि बढ्ने योजना बनेको छ ।

सत्ता गठबन्धनको भागबन्डाअनुसार रसुवा, सिन्धुपाल्चोक, दोलखा, रामेछाप र नुवाकोट, सिन्धुलीमा नेकपा एस उम्मेदवारविहीन बन्न पुगेको हो ।

उक्त पार्टीका एक नेताले बताएअनुसार, मनोनयन दर्ता गर्ने अन्तिम समयमा रिक्त रहेका जिल्लामा अलग्गै उम्मेदवारी दर्ता गरिँदैछ । त्यसका लागि उम्मेदवारहरू तयार पारिसकिएका छन् ।

गठबन्धनमा संघतर्फ बागमती प्रदेशबाट उक्त पार्टीका चार उम्मेदवार छन् । मकवानपुर २ मा विरोध खतिवडा, धादिङ १ मा राजेन्द्रप्रसाद पाण्डे, काठमाडौं ८ मा जीवनराम श्रेष्ठ र ललितपुर २ मा कृष्णलाल महर्जन उम्मेदवार छन् ।

यसमध्ये मकवानपुरमा प्रदेशसभातर्फ एकीकृत समाजवादी शून्य छ । त्यहाँ राजाराम स्याङ्तानका लागि एउटा प्रदेशसभा दाबी गरे पनि संघ पाएको भन्दै कांग्रेस र माओवादीले प्रदेश छोड्न चाहेनन् ।

चितवन, धादिङ, नुवाकोट र काभ्रेबाट उक्त पार्टीले एक–एक प्रदेशसभा सदस्यको उम्मेदवारी पाएकोमा अन्तिममा नुवाकोट खोसिएपछि बागमतीमा नेकपा एसले विद्रोह गर्नुपर्ने अवस्था आएको छ ।

काठमाडौंमा प्रदेशतर्फ पाँच र ललितपुर र भक्तपुरमा एक–एक उम्मेदवारी पाएको छ ।