सन्दीप प्रकरण : किशोरीको उमेरबारे क्रिकेट संघका अध्यक्षले नयाँ ‘क्लु’ भेटेका हुन् ?

काठमाडौं । नेपाल क्रिकेट संघका अध्यक्ष चतुरबहादुर चन्दले हिजो एक टेलिभिजन च्यानललाई अन्तरवार्ता दिँदै यौनजन्य कसुरमा मुछिएका राष्ट्रिय क्रिकेटर सन्दीप लामिछानेको बचाउ प्रयास गरे । त्यस क्रममा उनले सन्दीपमाथि आरोप लगाउने किशोरीको ‘नाबालिग’ नरहेको आशयसमेत व्यक्त गरेका छन् ।

अहिले चर्चामा रहेको सो अन्तरवार्तामा चन्दको भनाइ यस्तो छः

अन्तरवार्तामा उनले यस्तो भनेका थिए : तपाई मिडियाकर्मीहरुलाई बढी थाहा हुनुपर्ला कि १८ वर्षभन्दा माथि यस्तो खालको प्राण चैं जुटिसकेको अवस्था छ । मैले बुझेको मैले सुनेको आधारमा-कन्फिडेन्सका साथ भन्न सक्छु जुन पिडित बालिका भनिएको छ उनको उमेर १८ वर्षभन्दा माथि छ । एक वर्ष उमेर घटाइएको छ भन्ने कुुरा सरकारी कागजातहरुले पुष्टि गरेको छ ।

सम्बन्धित उहाँको गाउँपालिका वडा पालिकाहरुले नेपाल प्रहरीले अनुसन्धान गर्दा । त्योबाट मलाई आशंका भयो कि कुनै न कुनै तरिकाले सन्दीपमाथि त्यस्तो खालको षडयन्त्र भएको हुन सक्छ । किन भने एज घटाइएको छ भन्ने कुरा आइसकेपछि त्यसको पुष्टि चाहिँ नेपालको कानून अनुसार १८ वर्षभन्दा मुनिको व्यक्तिलाई नाबालिग मानिन्छ । नाबालिगलाई सहमतिमा राखेको यौनसम्बन्ध पनि बलात्कार ठहर्छ । तर १८ वर्ष उमेर नाघेको अवस्थामा सहमतिको यौनसम्बन्ध दण्डनीय हुँदैन । त्यसैले यस घटनामा जाहेरीकर्ताको वास्तविक उमेर निकै महत्वपूर्ण हुन्छ ।

क्रिकेट संघजस्तो जिम्मेवार निकायमा रहेका व्यक्तिले जाहेरीकर्ता किशोरीको उमेर १८ वर्ष नाघिसकेको दाबी गरेपछि त्यसले चर्चा बटुल्नु स्वभाविकै भयो । त्यसमै टेकेर कतिले समाचार पनि बनाएका छन् । यद्यपि, नेपाल प्रेससँगको कुराकानीमा चन्दले आफूसँग किशोरीले उमेर बढाएको प्रमाणित हुने कुनै ठोस प्रमाण भने नरहेको स्वीकार गरेका छन् ।

के आधारमा यस्तो दाबी गर्नुभयो त भन्ने प्रश्नमा घुमाउरो जवाफ दिँदै चन्दले यस्तो भने:

‘जाहेरीकर्ताको वास्तविक उमेरलाई लिएर हप्ता १० दिनदेखि हल्ला आइरहेको थियो । यद्यपि, अहिलेसम्म हामीसित त्यस्तो केही डकुमेन्ट आइपुगेको छैन । हामी पनि आफ्नो हिसाबले खोज्दैछौं । उमेर सच्याएको भनेर आइरहेको हुनाले यो विषयमा चाँडोभन्दा चाँडो प्रहरीले अनुसन्धान गर्नुपर्छ भन्ने मेरो भनाइ हो । हामीसँग डकुमेन्ट नभए पनि सम्वन्धित निकायले, प्रहरीले ल्याउनुपर्यो । जन्मदर्ताको कुरा सुन्नमा आएको छ । तर पेपर नहुञ्जेल ठोकुवा गरेर भन्न मिलेन । नेपालमा अधिकांसले एसएलसी दिँदा वा एसएलसीको फाराम भर्दाखेरि वास्तविक उमेरभन्दा घटाउने प्रचलन देशभरी रहेछ । सबैका अभिभावकले त्यो भने । जागीरका लागि वा विहेका लागि धेरैले त्यस्तो धेरैले गर्दा रहेछन् । मैले यही कुरा जानकारी गराएको हो । बजारमा केही कुरा आउँछ भने डिसिजनमा पुग्नुपर्ला नि । त्यसैका लागि बोलेको हुँ ।’

सन्दीपको तर्फबाट बहसको तयारी गरिरहेका कानून व्यवसायी सरोज घिमिरेले पनि जाहेरीकर्ताको उमेर विवादित रहेको सूचना आफूकहाँ पनि आएको तर ठोस प्रमाण नरहेको बताए ।

‘मैले पनि धेरै कुराहरु सुनिरहेको छु । तर हातमा प्रमाण नभएसम्म बोल्न मिल्दैन । जे होस, शंका गर्ने ठाउँ छ,’ उनले भने ।

घिमिरले भोलिबाट आफ्नो टिमले आन्तरिक अनुसन्धान सुरु गर्ने र उमेरको विषयमा पनि खोजिनिति गर्ने बताए ।
यसैगरि, संन्दीप बचाउ संघर्ष समितिले आजै एक विज्ञप्ति जारी गर्दै पिडित भनिएकी किशोरीको नागकिरताको उमेर र जन्मदर्ताको उमेरमा दुई वर्षको फरक रहेको दावी गरेको छ । किशोरीको जन्मदर्ता र नागरिकता छिटोभन्दा छिटो सार्वजनिक गर्नुपर्ने माग पनि विज्ञप्तिमा गरिएको छ ।