अनसनरत डा केसीको अवस्था जटिल बन्दै, सुविधा सम्पन्न अस्पताल लैजान सेतीको आग्रह

कैलाली । स्वास्थ्य सेवा सुधारको माग गर्दै धनगढीमा अनसन बसिरहेका डा. गोविन्द केसीको अवस्था जटिल बन्दै गइरहेको छ । आठ दिनदेखि अनसनमा रहेका केसीलाई टाउको दुख्ने रिँगटा लाग्ने, थकान लाग्ने, श्वास फेर्न गाह्रो हुने, शरीरको मांसपेशी दुख्ने लगायतका समस्या देखिएको सेती प्रादेशिक अस्पतालले जनाएको छ । अस्पतालले आज एक विज्ञप्ति जारी गर्दै केसीको अवस्था जटिल बन्दै गइरहेको भन्दै सुविधा सम्पन्न अस्पतालमा लैजान सुझाव समेत दिएको छ ।

२० औं अनसनमा धनगढीको कृष्ण मन्दिर धर्मशालामा बसेका डा केसीको स्वास्थ्य बिग्रिएपछि मंगलबार उनलाई धनगढीस्थित सेती प्रादेशिक अस्पताल भर्ना गरिएको थियो । उनलाई अस्पतालमा राखिए पनि स्वास्थ्यमा सुधार भने आएको छैन । बरु थप बिग्रँदै गएको छ । डा केसीको तौल ३ किलो घटिसकेको छ । शरीरमा र पोषण तत्व र पानीको कमी हुँदा बेहोस हुन सक्ने, कम्पन हुन सक्ने, मुटुको धड्कन तथा रक्तचाप असन्तुलन भई शरीरका अन्य अङ्गमा समेत थप सम्भावित जटिलता देखा पर्न सक्ने विज्ञप्तिमा उल्लेख छ ।

केसीको मांसपेशी सुक्दै गएको र अल्सर भई रक्तस्रावको शङ्का भएको भन्दै सेती प्रादेशिक अस्पतालले विशिष्टीकृत अस्पतालमा स्थानान्तरणको पहल गरिदिन प्रदेशको मानव अधिकार आयोग, प्रदेशको सामाजिक विकास मन्त्रालय, जिल्ला प्रशासन कार्यालय र संघीय स्वास्थ्य मन्त्रालयलाई जानकारी गराइसकेको जनाएको छ ।