सामाजिक सञ्जालमा सन्दीप प्रकरणः सेलिब्रिटीलाई उछिन्दै ‘टक अफ द टाउन’ बने दुर्गा प्रसाईं

काठमाडौं । केही दिनदेखि नेपालको सामाजिक सञ्जाल सन्दीप लामिछानेमय बनिरहेको छ । प्रहरी अनुसन्धानमा रहेको घटनालाई लिएर सञ्जाल प्रयोगकर्ताहरू आफैँ न्यायाधीश बन्दै फैसला सुनाइरहेका छन् ।

आजका दिनसम्म सन्दीप लामिछाने एक आरोपी हुन् । उनीविरुद्ध यौनजन्य कसुरमा जाहेरी परेको छ र प्रहरीले अनुसन्धान गरिरहेको छ । सन्दीप नेपालमा नरहेकाले उनी पक्राउ परेका छैनन् । प्रहरी र नेपाल क्रिकेट संघको सम्पर्कमा नरहेका उनी कहाँ छन् भन्ने अन्योल बढ्दो छ ।

यता सामाजिक सञ्जाल सन्दीपको पक्ष र विपक्षमा बाँडिएको छ । एकथरि उनको खोइरो खन्न तल्लिन रहँदा भने अर्काथरि उनीप्रति सहानुभूति दर्शाइरहेका छन् । सामाजिक सञ्जालका विभिन्न प्लेटफर्मममा फरक-फरक ट्रेन्ड देख्न पाइन्छ । ट्वीटरमा बढीजसो सन्दीपप्रति आलोचनात्मक प्रतिक्रियाहरू आइरहेका छन् । फेसबुकमा मिश्रित छ । तर, अहिलेको सबैभन्दा लोकप्रिय एप टिकटकमा चाहिँ अधिकांशले सन्दीपको बचाउ गरिरहेका छन् ।

केही नाम चलेका सेलिब्रिटीले पनि सन्दीप प्रकरणमा मुख खोलेका छन् । उनीहरूका अभिव्यक्तिमाथि पनि सामाजिक सञ्जाल प्रयोगकर्ता ध्रुवीकृत छन् । एकथरिले उनीहरूलाई समर्थन गरेका छन् त अर्काथरिले विरोध । अहिलेसम्म जति सेलिब्रिटीले मुख खोलेका छन्, उनीहरूको पनि सहानुभूति सन्दीपप्रति नै देखिएको छ ।

गायक शिव परियारको स्टाटस सबैभन्दा बढी विवादित बन्यो । उनले ‘पेशेवर पीडित’ हरूले बलात्कारको धन्दा गरिरहेको भन्दै उनीहरूको भण्डाफोर गर्नुपर्ने विचार राखेका थिए । अभिनेत्री तथा टिभी होस्ट रिमा विश्वकर्माले सन्दीपलाई अपराध प्रमाणित नभइकन अध्यागमन विभागले कालोसूचीमा राखेकोमा असन्तुष्टि व्यक्त गरिन् । यसैगरी, गायक प्रमोद खरेलले पनि सन्दीपप्रति सहानुभूति दर्शाउँदै स्टाटस लेखेका छन् । देशको झण्डा छातिमा बोकेर हिँड्ने व्यक्तिमाथिको कानूनी प्रक्रियालाई विनाहोहल्ला अगाडि बढाउन उनले सुझाव दिएका छन् ।

वरिष्ठ हास्यव्यंग्य कलाकार सन्तोष पन्तको अभिव्यक्तिले पनि चर्चा पायो । उनले एक अन्तर्वार्तामा यस घटनामा पीडित भनिएकी किशोरीप्रति विभिन्न प्रश्नहरू उठाएका थिए । पन्तको पनि पक्ष र विपक्षमा प्रतिक्रियाहरू आएका छन् ।

प्रतिक्रियाहरूको भीडमा सबैभन्दा बढी चर्चा कमाउन सफल भए व्यवसायी दुर्गा प्रसाई । पछिल्लो समय देशका जल्दाबल्दा विषयहरूमा स्पष्ट र हक्की शैलीमा उनले दिएका अन्तर्वार्ता लगातार भाइरल बनिरहेका छन् । सन्दीप प्रकरणमा उनले ऋषि धमलालाई दिएको अन्तर्वार्ताले बजार तताएको छ । उनले सो अन्तर्वार्तामा बलात्कारसम्बन्धी नेपालको कानून त्रुटिपूर्ण रहेको र यसले जोकोहीलाई बलात्कारीको ट्याग भिराइदिन सक्ने बताएका थिए । युट्यूवमा राखिएको उनको अन्तर्वार्तामा लगभग सतप्रतिशत प्रतिक्रिया उनको समर्थनमा छन् ।

टिकटकमा पनि अत्यधिक चर्चा पाएको प्रसाईँको अभिव्यक्तिका मुख्य बुँदा यस्ता थिए-

– पल शाहलाई मिडियाले सिध्याए । अब सन्दीपलाई पनि सिध्याए । यो डिजाइन अनुसार आएको छ । यो हिसाबले जाने हो भने सबैले खोले भने सबैभन्दा पहिले नेताहरू जान्छन् । ९५ प्रतिशत मान्छे जान्छन् ।

– बलात्कार भनेको विदइन सेकेन्डमा हुनुपर्छ । ५ दिनपछि हुन्छ बलात्कार ? अस्ति मजाले मिलेर कोठामा जाने । मोजमस्ती गर्ने । सँगै फर्केर आउने, राति होटलमा बस्ने । १५ दिनपछि मलाई बलात्कार गर्‍यो भन्दा त्यस्तो कानून पास गर्ने यीनहरू के हुन् ? कानून कस्तो बुद्धि भएकाले पास गरेको हो ?

– बलात्कार भयो भने एक घण्टाभित्र उजुरी दिन सकिन्छ । प्रहरी थाना टाढा छ भने अलिक टाइम लाग्ला । तत्काल उजुरी दिएमा उसको वीर्यदेखि फाटेको कपडा सबै भेटिन्छन् । तर, १५ दिनपछि उजुरी दिएर के भेटिन्छ ?

– १७ वर्षको केटी नाबालिग हुँदैनन् । उहिले हाम्रा आमाले १५ वर्षमा नानी जन्माएको हो । महिनावारी भएपछि केटीहरू बालिग हुन्छन् । जे पनि कानून बनाएको छ । यो भन्यो भने मलाई मुख छाड्छन् । तर, वास्तविकता त्यही हो । प्रकृतिले दिएको कुरा पनि यही हो । सन्दीप र पल शाह चैं बलात्कारी होइनन् । बार्गेनिङमा कुरा नमिलेपछि बलात्कार भनिएको हो ।

– म आफैंलाई टेन्सन हुन थालिसक्यो । हस्पिटलमा आउँदा फोटो खिच्न आउँछन् । केटीहरूको छेउमा जाने कि नजाने । पर पर बस है बैनी हो भन्ने बेला भइसक्यो । यो स्थिति कसरी सिर्जना भयो भन्नुस् त ? जसले जे मन लाग्यो त्यही भनेको छ । जम्मैलाई सिध्याउन थाले । भोलि तपाईं पनि छुट्नुहुन्न, म पनि छुट्दिन । कोसित हिँडिन्छ, कोसित फोटो खिचिन्छ, त्यो पनि गर्नु नहुने भयो ।

– कसले बनाएको यस्तो कानून ? कानून यस्तो हुन्छ ? प्रकृतिले दिएको कुरा १५-१६ वर्षदेखि केटीहरूले बच्चा जन्माउँछन् । १८ वर्षका लागि नाबालिग बनाउने मान्छे के हुन् ? लभ गर्छन् ७ क्लसमा पढ्दादेखि । चिठी पठाउँछन्, डेटिङ जान्छन् । ढाक्रे हली, गोठालाहरूलाई संविधान बनाउने ठाउँमा लगेर राखेपछि के हुन्छ ? त्यसकै परिणाम आज व्यापारीले १८ प्रतिशत ब्याज बोक्नुपरेको छ । अब झुण्डिएर मर्नुपर्ने छ सबैले । एउटा रुखमा ३ जना चेलीहरू झुण्डिएर मरे, त्यसको कुरा आउँदैन । भोकभोकै छन् मान्छे । नेपालबाट नेपाली खेदाउन र विदेशी ल्याएर राज्य सञ्चालन गर्ने रणनीति अनुसार चलिरहेका छन् ।