बलात्कार आरोपमा उजुरी परेपछि फरार लहानका उपप्रमुख महतो प्रहरीमा हाजिर
![](https://www.nepalpress.com/wp-content/uploads/2020/11/nepalpress-logo-n.png)
![](https://www.nepalpress.com/wp-content/uploads/2022/09/mahat.jpg)
जनकपुरधाम । बलात्कार आरोपमा उजुरी परेपछि फरार भएका सिरहाको लहान नगरपालिकाका उपप्रमुख रामचलित्तर महतो इलाका प्रहरी कार्यालय लहानमा हाजिर भएका छन् ।
साउनको पहिलो साता उपप्रमुख महतोमाथि एक महिलाले जबरजस्ती करणी उद्योग अन्तर्गत लहान प्रहरीमै जाहेरी दर्ता गराएकी थिइन् । मुद्दा दर्ता भए लगत्तै उपप्रमुख महतो नगरपालिका जान छाडेका थिए ।
पक्राउ पर्ने डरले उनी करिब डेढ महिना सम्पर्क विहीन बने । उनी आज दिउँसो ईप्रका लहानमा हाजिर भएको सिरहाका प्रहरी प्रमुख एसपी अर्जुन प्रसाद तिमिल्सिनाले जानकारी दिए ।
‘उपप्रमुख महतो ढिलो गरी हाजिर भएकाले अदालतबाट अनुसन्धानका लागि म्याद पनि लिन सकेनौं’, उनले भने, ‘भोली त शनिवार नै भयो । अब आइतबार म्याद थप हुन्छ ।’
हाजिर भए लगत्तै अनुसन्धान सुरु भइसकेको र अनुसन्धान सकेपछि अदालतमा बुझाउने उनको भनाई छ ।
लहान नगरपालिकाले दैनिक ज्यालादारीमा कम्प्युटर अपरेटर सम्बन्धी विज्ञापन गरेको थियो । सो पदका लागि दरखास्त दिएकी एक महिलाले जागिर लगाइदिने लोभ दिएर आफूमाथि उपप्रमुख महतोले आफ्नो कार्यकक्षको गोप्य कोठामा लगी जबरजस्ती करणीको प्रयास गरेको आरोप लगाएकी छन् ।
महतो जनता समाजवादी पार्टी जसपाबाट उपप्रमुखमा निर्वाचित भएका हुन् ।