कांग्रेस बैठकमा केसीको प्रश्न- पार्टीभित्रकै एक पक्षलाई तिरस्कार गरेर चुनावी गठबन्धनको वैशाखी किन ?

काठमाडौं । नेपाली कांग्रेसका नेता अर्जुननरसिंह केसीले पार्टीभित्रको एउटा पक्षलाई तिरस्कार गरेर गठबन्धनका नाममा सभापति शेरबहादुर देउवाले आफ्नो पक्षको मात्र हित सोचेको भन्दै केन्द्रीय समिति बैठकमा असन्तुष्टि पोखेका छन् ।

केन्द्रीय कार्य समितिको बिहीबारको बैठकमा लिखित धारणा राख्दै नेता केसीले स्थानीय तहको निर्वाचनमा कांग्रेसलाई गठबन्धनको बैशाखी आवश्यक थियो कि थिएन भन्ने बहसको विषय बनेको बताएका छन् ।

उनले चुनावी गठबन्धन तत्कालीन रणनीतिमात्र रहेको भन्दै संघीय र प्रदेश संसदको निर्वाचनमा गठबन्धन आवश्यक छ भने पार्टीको स्वाभीमान र सम्मानजनक हैसियतको रक्षा गर्ने स्पष्टतासहित निश्चित मापदण्ड र आचारसंहिता हुनुपर्ने बताएका छन् ।

उनले भनेका छन्, ‘यी दुवै तहका संसदीय निर्वाचनमा कांग्रेसले बहुमतको लक्ष्य राख्नुपर्छ । गठबन्धनको औचित्य र कांग्रेसको निर्णायक हैसियत कायम राख्न पार्टीभित्र बृहत ऐक्यबद्धताको उत्साही वातावरण बनाउन जरुरी छ ।’