सानेपामा कांग्रेस कार्यकर्ताको नारा- हामी केही जान्दैनौं, एकाधिकार मान्दैनौं

काठमाडौं । पार्टीका भ्रातृ संगठनहरूमा सभापति शेरबहादुर देउवाले एकलौटी गरेको भन्दै शेखर कोइराला पक्षधर कांग्रेस कार्यकर्ताले सोमबार केन्द्रीय कार्यालयमा विरोध प्रदर्शन र नाराबाजी गरेका छन् ।

नेविसंघका विद्यार्थीहरूले परिवर्तनकारी विधान कार्यान्वयनको माग राख्दै भ्रातृ संस्थाको तत्काल वैधानिक पूर्णता माग गरेका हुन् । प्रदर्शनमा तरुण दलका कार्यकर्ता पनि सहभागी थिए ।

‘हामी केही जान्दैनौं, एकाधिकार मान्दैनौं’ भन्दै कार्यकर्ताले केन्द्रीय कार्य समिति बैठकअघि नाराबाजी गरेका हुन् । उनीहरूले बैठकमा सहभागी हुन गएका नेताहरूलाई पनि आफ्ना माग सुनाएका छन् ।

भ्रातृ संगठनलाई जीवित गर्न र पार्टीको विधान लागू गर्न उनीहरुले माग गरेका हुन् । प्रदर्शनकारी समक्ष पुगेका केन्द्रीय सदस्य नैनसिंह महरले भ्रातृ संगठनहरूको कुरा आफूले बैठकमा उठाउने आश्वासन दिए ।

तस्बिरहरू : उमेश कार्की ।