नयाँ मन्त्रीलाई माधव नेपालको निर्देशन- विकृतिमा नफस्‍नू, पार्टीको शिर उँचो राख्नू

काठमाडौं । नेकपा एसका अध्यक्ष माधवकुमार नेपालले पार्टीबाट गएका नयाँ मन्त्रीहरूलाई विकृति विसंगतिमा नफस्न र सेवा प्रवाह चुस्तदुरुस्त बनाउन निर्देशन दिएका छन् ।

भर्खर नियुक्त मन्त्रीहरूलाई पार्टी कार्यालयमा सरकार सञ्चालनबारे प्रशिक्षणमूलक निर्देशन दिँदै नेपालले देश र जनताको हितलाई केन्द्रमा राखेर इमानदारीपूर्वक काम गर्न निर्देशन दिएका हुन् ।

‘तपाईँहरूले जनतामा सकारात्मक छाप पर्ने गरी र पार्टीको शिर उँचो हुनेगरी काममा खटिनुपर्छ । जसले गर्दा सरकारको इज्जत बढोस् त्यसका लागि पारदर्शीरूपमा काम गर्नुहोस्’, अध्यक्ष नेपालले भने ।

संविधान र कानूनविपरीत कुनै पनि काम नगर्न भन्दै नेपालले पार्टीको नीति, निर्देशनविपरीत नजान पनि ध्यानाकर्षण गराएका छन् ।

समाजवादीको तर्फबाट पर्यटनमन्त्रीमा जीवनराम श्रेष्ठ, सहरी विकासमा मेटमणि चौधरी, स्वास्थ्यमन्त्रीमा भवानीप्रसाद खापुङ, श्रममा शेरबहादुर कुँवर र स्वास्थ्यराज्यमन्त्रीमा हिराचन्द्र केसीलाई जिम्मेवारी दिइएको छ ।