नागरिकता विधेयक यही कार्यकालमा पारित गर्ने गरी छलफल अघि बढेको छ : सभामुख सापकोटा
![](https://www.nepalpress.com/wp-content/uploads/2020/11/nepalpress-logo-n.png)
![](https://www.nepalpress.com/wp-content/uploads/2022/06/Sabhamukha.jpg)
काठमाडौं । सभामुख अग्निप्रसाद सापकोटाले नागरिकता विधेयक यही कार्यकालमा पारित गर्नेगरी छलफल अघि बढेको बताएका छन् ।
संसदीय मामिला पत्रकार समाजले प्रकाशन गरेको ‘संसदीय समिति अभ्यास पहिलो संसददेखि संघीय संसदसम्म’ पुस्तकको आइतबार विमोचन गर्दै उनले यस्तो बताएका हुन् ।
सभामुख सापकोटाले बीउबिजन विधेयक पारित भएको उदाहरण प्रस्तुत गर्दै नागरिकता विधेयक पारित नहुँदा नागरिकता पाउन नसकेका धेरै युवाले आफूलाई भेटेर पीडा पोखेको सुनाए । उनले यही कार्यकालमा नागरिकता विधेयक पास गर्न प्रधानमन्त्रीदेखि विभिन्न पक्षसँग छलफल अघि बढाएको पनि जानकारी दिए ।
सभामुख सापकाटोले अलिकति मेहनत गरिए आठ वटा प्रतिस्थापन विधेयक पनि पास गर्न सकिने बताए । उनले भने, ‘संसदको कानून निर्माण गर्नेमात्रै नभएर गुणस्तरीय कानुन निर्माण गर्ने दायित्व हो । कानूनका नौ सिङ हुन्छन् भनेझैं अहिले कानूनको दुरुपयोग हुँदै गएको छ । त्यस्तो नहुने गरी कानून बनाउनु आवश्यक छ ।’
संसद लोकतन्त्रको आत्मा रहेको बताउँदै उनले लोकतन्त्रलाई बलियो बनाउन आफूहरुले गर्ने आनीबानी पनि लोकतान्त्रिक हुनुपर्नेमा जोड दिए । सभामुख सापकोटाले सुशासन र भष्टाचार नियन्त्रणका लागि आफू र आफ्नो सचिवालय प्रतिबद्ध भएर लागेको बताए ।
विमोचित पुस्तक प्रभावकारी रहेको उनको भनाइ छ ।