भैरहवाको बालसुधार गृह सार्न खोज्दा झडप, डीएसपीसहित दुई प्रहरी घाइते
![](https://www.nepalpress.com/wp-content/uploads/2020/11/nepalpress-logo-n.png)
![](https://www.nepalpress.com/wp-content/uploads/2022/06/289005116_751296312667844_931543765039587965_n.jpg)
रुपन्देही । रुपन्देहीको भैरहवास्थित बालसुधार गृहमा रहेका केही किशोरहरूलाई स्थानान्तरण गर्ने विषयमा झडप हुँदा मङ्गलवार भैरहवामा तनाव भएको छ ।
झडपमा डीएसपीसहित दुई प्रहरी घाइते भएका छन् । स्थानान्तरणको विरोध गरिरहेकाहरूको आक्रमणबाट रुपन्देहीका डीएसपी नवरत्न पौडेल र टोपबहादुर मगर घाइते भएका हुन् ।
मङ्गलवार केही किशोरलाई स्थानान्तरका लागि तयारी गरिएको थियो । त्यसपछि आक्रोशित किशोरहरूले सुधार गृहको भवनको सिसा तोडफोड गर्ने, चक्कु समाएर घाँटी रेटेर मर्छौ भन्ने, विभिन्न सामग्रीले सुरक्षाकर्मीलाई प्रहार गर्ने लगायतका क्रियाकलाप गरेका थिए ।
यस्तै, किताब र सिरक डसनामा आगोसमेत लगाएका थिए । किशोरहरूले होहल्ला गरेर तोडफोड र आक्रमणमा उत्रिएपछि बाक्लो सुरक्षाकर्मी परिचालन गरिएको थियो । दिनभर यहाँ तनाव भएको थियो ।
यसअघि गत वैशाखमा पनि उनीहरूले तोडफोड गर्दा सुधार गृहमा करिब एक लाख बराबरको क्षति भएको सुधार गृह प्रमुख सुभद्रा गौतमले जानकारी दिइन् ।
किशोरहरू निरन्तर होहल्ला गर्दै आक्रोशित भएपछि सुरक्षाकर्मीले अन्य कुनै घटना नहोस् भनेर संयमता अपनाएका थिए । नेपाल प्रहरी, सशस्त्र प्रहरीको लामो प्रयास पछि आक्रोशित किशोरहरूलाई नियन्त्रणमा राख्न सुरक्षाकर्मी सफल भएका थिए ।
यहाँ रहेका किशोरहरूले विगतदेखि नै यस्तै क्रियाकलाप गर्दै आएका छन् । किशोरहरूले झ्यालबाट सुधार गृहको छेउको बाटोबाट हिँडडुल गर्ने महिलाहरूलाई जिस्क्याउने, फोहोर शब्दको प्रयोग गर्ने गर्दै आएका छन् ।
यसबाट आजित भएका स्थानीयले मङ्गलवार मात्रै जिल्ला प्रशासन कार्यालयमा पुगेर सुधार गृह स्थानान्तरण गर्न माग गर्दै प्रमुख जिल्ला अधिकारीलाई ज्ञापन पत्र बुझाएका थिए ।
भैरहवामा चार वर्ष अघिदेखि प्रदेशस्तरीय बाल सुधार गृह सञ्चालनमा आएको हो ।
कानुनको विवादमा परेका बालकहरूलाई यहाँ राखिन्छ । तर उमेर बढ्दै जाँदा उनीहरूले अवाञ्छनीय क्रियाकलाप गर्न थालेका छन् । पटक–पटकको घटनापछि सुधार गृहबाट केही किशोरहरूलाई स्थानान्तरण गरिएको ।
सुधार गृह प्रमुख गौतमका अनुसार १७ जना किशोरलाई यहाँबाट नेपालगन्ज, भक्तपुर र पोखरा स्थानान्तरण गरिएको छ ।
६० जना क्षमता रहेको सुधार गृहमा १ सय १० जनालाई राखिएको थियो । क्षमता भन्दा बढी कानूनको विवादमा परेका किशोरहरूलाई राख्दा पनि यहाँ कयौँ पटक उनीहरूले उद्दण्ड मच्चाउँदै आएका छन् ।