बास्कोटालाई अर्थमन्त्रीको जवाफ- प्रतिपक्ष झलझली देखिरहेको छु, पेन ड्राइभको कुरा बनावटी कथा

काठमाडौैं । अर्थमन्त्री जनार्दन शर्माले सरकारले ल्याएको बजेटको लोकप्रियता समाप्त पार्नका लागि विभिन्न कथाहरू रचिएको दाबी गरेका छन् ।

प्रतिपक्षी एमालेले बजेट निर्माणमा अनधिकृत व्यक्तिलाई प्रवेश गराइएको भन्दै राजीनामा मागेपछि जवाफमा उनले यस्तो दाबी गरेका हुन् ।

एमालेका सांसद गोकुल बास्कोटाले अर्थ मन्त्रालयबाट बिहान ५ बजे पेन ड्राइभ कसले लगेको थियो भन्दै प्रश्न गरेका थिए । अर्थमन्त्री शर्माले यसलाई बनावटी कथाको संज्ञा दिए ।

उनले भने, ‘अस्तिसम्म एउटा मान्छेको नाम आएको थियो । आज अर्को नयाँ कथा आयो । नयाँ–नयाँ कथा बुनेर सरकारको हुर्मत लिने, बजेटको लोकप्रियतालाई समाप्त पार्ने तथा सरकारमाथि हमला गर्ने काम भइरहेको छ । पेन ड्राइभको कुरा पनि एउटा बनावटी कथा भन्दा बढी केही होइन ।’

बास्कोटाले भनेजस्तो आफूले ‘प्रतिपक्ष कहाँ छ ?’ भनेर कतै नभनेको अर्थमन्त्रीले बताए ।

उनले भने, ‘मैले प्रतिपक्ष कहाँ छ भनेर भनेकै छैन । कुनै सन्दर्भ वा प्रसङ्गको विषय हुन सक्छ । तर मैले प्रतिपक्ष नदेखेको भन्ने होइन । मैले प्रतिपक्ष झलझली देखिरहेको छु । हिजो सत्तापक्षमा सँगै हुँदा पनि साथीहरूलाई देखिरहेको चिनिरहेको हो । विघटन हुँदा, आन्दोलनमा जाँदा पनि देखिरहेकै छौँ । नदेखेको कहाँ छ र ? कहाँ चुनौती दिइयो ? त्यस्तो विल्कुल होइन ।’

सरकारको तर्फबाट प्रतिपक्षलाई गर्ने सम्मानमा कमी नआउने उनले बताए । प्रतिपक्षले गरेको राजीनामाको माग भने उनले घुमाउरो तवरले अस्वीकार गरे ।

जनताले बजेटलाई गलत भनेको खण्डमा आफू जुनसुकै निर्णय लिन तयार रहेको उनको भनाइ थियो ।

शर्माले भने, ‘यो सरकारले ल्याएको लोकप्रिय बजेटको महत्त्वलाई गिराउने काम नगर्दा राम्रो हुन्छ । बजेटको विषयमा जनतालाई सोध्नुपर्छ । व्यवसायीलाई, किसानलाई, दलितहरूलाई सोध्नुपर्छ । उनीहरूका लागि बनाएको बजेट गलत ठहर भयो भने कुनै पनि निर्णय गर्न तयार छु । जनताले गलत छ भनेमा मान्नुपर्ने हुन्छ ।’