रिया चक्रवर्ती भन्छिन्, ‘म तिमीलाई हरेक दिन मिस गर्छु सुशान्त’

काठमाडौं । बलिउड अभिनेता सुशान्त सिंह राजपूतको आज दोस्रो पुण्य तिथि । १४ जुन २०२० मा निधन भएका राजपूतको पुण्य तिथिमा उनका फ्यान र नजिकका साथीहरूले सामाजिक सञ्जालमार्फत सम्झेका छन्।

यसै क्रममा सुशान्तकी पूर्व प्रेमिका रिया चक्रवर्तीले पनि सम्झना स्वरूप आफूहरूले बिताएका पलका तस्बिरहरू आफ्नो सामाजिक सञ्जालमा साझा गरेकी छिन ।

चक्रवर्तीले तस्बिर सेयर गर्दै भनेकी छन्, ‘म तिमीलाई हरेक दिन मिस गर्छु।’

उदाउँदो ताराका रूपमा चिनिएका राजपूत मुम्बईको आफ्नै अपार्टमेन्टमा मृत भेटिएका थिए। मृत्यु हुनु अघिसम्म रिया र सुशान्त एक अर्कालाई डेट गरिरहेका थिए।

उनको मृत्युको केही दिनपछि सुशान्तका बुबा केके सिंहले रियालाई आत्महत्या गर्न दुरुत्साहन गरेको र मनी लन्ड्रिङ गरेको आरोप लगाउँदै एफआईआर समेत दायर गरेका थिए।

सम्पत्ति शुद्धीकरण र लागूऔषध कारोबारको अभियोगमा अनुसन्धान गरिरहेको प्रवर्तन निर्देशनालय र लागूऔषध नियन्त्रण ब्युरोसँगको मुद्दालाई केन्द्रीय अनुसन्धान ब्युरोमा पठाइएको थियो ।

सेप्टेम्बर २०२० मा रिया र उनको कान्छो भाइ शौक चक्रवर्तीलाई नार्कोटिक्स कन्ट्रोल ब्युरोद्वारा अभिनेता सुशान्त सिंह राजपूतको मृत्युसँग सम्बन्धित लागू औषध मुद्दामा पक्राउ गर्‍यो।

दुवैलाई मुम्बईको भायखला जेलमा पठाइएको थियो जहाँ रियाले एक महिना बिताइन भने शौकले तीन महिनापछि जमानत पाए।

गत वर्ष मात्र मुम्बईको अदालतले रियाको ल्यापटप, मोबाइल फोन र अन्य ग्याजेटहरू फिर्ता गर्न आदेश दिएको थियो जुन अनुसन्धानको क्रममा जफत गरिएको थियो।