एरेन्ज म्यारिज गरेको हुँ, लभ पर्नै नपाइ श्रीमान अमेरिका फर्किनुभो: वर्षा शिवाकोटी – Nepal Press

एरेन्ज म्यारिज गरेको हुँ, लभ पर्नै नपाइ श्रीमान अमेरिका फर्किनुभो: वर्षा शिवाकोटी

काठमाडाै‌ं । नायिका वर्षा शिवाकोटीले कुनै हल्लाखल्ला बिना केही दिनअघि सुटुक्क विहे गरिन् । यतिबेला उनले सबैसँग गुपचुप बिहे गरेको बारे स्पष्टीकरण दिँदै हिँड्नुपरेको छ ।

अमेरिका निवासी आशिष गेलालसँग गत ९ वैशाखमा लगनगाँठो कसेकी वर्षा केही दिन सामाजिक सञ्जालमा तस्वीरहरु सेयर गर्न विजी भइन् । श्रीमानसँग पोखरा पुगेर सर्ट हनिमून मनाइन् । अहिले केही फुर्सदमा छिन् उनी । किनकी श्रीमान आशिष अमेरिका फर्किसकेका छन् ।

नवविवाहित वर्षा आज आफू अभिनित चलचित्र ‘लक्का जवान’ को विशेष शो हेर्न सिनेमा हलमा पुगेकी थिइन् । साडी चोलाे र सिउँदोमा सिन्दुर लगाएर फिल्म हेर्न पुगेकी वर्षाले त्यहाँ पुगेका पत्रकारलाई विवाहको बारे प्रष्टीकरण दिनुपरिहाल्यो । वर्षाले छोटो तयारीमा सानो जमघटमा विवाह गरेको जानकारी गराइन् ।

‘एक हप्ताको मात्रै तयारीमा हामीले विवाह गरेका हौं,’ उनले भनिन्, ‘थोरै मान्छे बोलाउने भनेका थियौं, तर दुवैतिरका गरी ५०–६० जना त भइहालियो ।’

धेरैलाई यो पनि कौतुहल छ कि उनले प्रेम विवाह गरेकी हुन् वा मागी विवाह ? वर्षाले यो मागीविवाह भएको बताइन् । आफन्तहरुमार्फत कुरा आएर दुवैले एक अर्कालाई मन पराएपछि विवाह गरेको उनको भनाइ छ । आफू केही समयअघि अमेरिका गएर केटासँग भेटेपछि विवाहको सोच बनाएको उनले जानकारी दिइन् ।

‘लभ त पर्नै पाएको छैन,’ वर्षाले गुनासो सुनाइन्, ‘उहाँ केही दिन मात्र छुट्टि लिएर नेपाल आउनुभएको थियो, विहे गरेको ४–५ दिनपछि नै अमेरिका फर्किनुभयो ।’


प्रतिक्रिया

Leave a Reply

Your email address will not be published. Required fields are marked *