काठमाडौं नफेरिएको भन्दै सिर्जनाले भनिन्- सबैको सल्लाह र समन्वयमा महानगर चलाउँछु

काठमाडौं । नेपाली कांग्रेसबाट काठमाडौं महानगरपालिकाको मेयर पदकी उम्मेदवार सिर्जना सिंहले काठमाडौंको व्यवस्थित विकास जरुरी रहेको बताएकी छन् ।

आज सामाजिक क्षेत्रमा सक्रिय महिलाहरूसँगको अन्तरक्रिया कार्यक्रम उनले भनिन् ‘काठमाडौं २५ वर्षअघि जस्तो थियो, अहिले पनि त्यस्तै छ । झन्‌झन् दयनीय अवस्था हुँदैछ । सबै अस्तव्यस्त छ, एकदमै धुलो धुँवा, नदीनाला सबै अस्तव्यस्त छ । सबै चिज बनाउँनुपर्ने छ । केही पनि बनेको छैन ।’

यसमा सबैको साथ चाहिने उनले बताइन् । ‘यसमा सबैको साथ चाहिन्छ । म एक्लो केही पनि होइन्, सबै सरोकारवालाहरूसँग सम्पर्क समन्वय गरेर काम गर्छु,’ उनले भनिन् ।

विकासे कामका लागि काठमाडौंमा बजेट अभाव पनि नरहेको उम्मेदवार सिंहले बताइन् । ठूलो बजेट भएको काठमाडौंका लागि योजनाबद्ध रूपमा काम गरे काम गर्नु ठूलो कुरा नभएको पनि उनले बताइन् ।

अन्तरक्रियाका क्रममा महिला सामाजिक अभियान्ताहरूले बालबालिकामैत्री संरचना, महिलामैत्री र सुरक्षित सहर निर्माण, सामाजिक कल्याणकारी राज्यसंरचना निर्माण लगायतका सवालमा महानगरबाट काम गर्नुपर्ने औल्याएका थिए ।

त्यसका लागि आफू सदैव छलफल गरेर काम गर्न तयार रहेको र आफैं सामाजिक अभियानमा सक्रिय व्यक्ति भएकाले जानकार रहेको उम्मेदवार सिंहले बताएकी थिइन् ।