पाल्पाको तिनाउमा एमाले र विप्लव नेतृत्वको माओवादी गठबन्धन

रुपन्देही । पाल्पाको तिनाउ गाउँपालिकामा विप्लव नेतृत्वको नेकपा माओवादीबाट स्वतन्त्र उम्मेदवारी दिएकाहरूले नेकपा एमालेलाई समर्थन गर्दै उम्मेदवारी फिर्ता लिएका छन् ।

गाउँपालिका प्रमुखमा उम्मेदवारी दिएका भुवन जिसीसहितका स्वतन्त्र उम्मेदवारहरूले एमालेलाई समर्थन गर्ने सहमति भएको नेकपा एमालेका जिल्ला सदस्य तथा तिनाउका इन्चार्ज दलबहादुर गुरुङले बताए ।

नेकपा एमालेको तर्फबाट गाउँपालिका अध्यक्षको लागि उम्मेदवार बनेका प्रेम श्रेष्ठलाई समर्थन गने गरी वडा तहमा समेत उम्मेदवारी दिएका स्वतन्त्र उम्मेदवाहरुले उम्मेदवारी फिर्ता लिएर एमालेलाई समर्थन गर्ने भएका हुन् ।

नेकपा एमाले प्रदेश कमिटी सदस्य ओमबहादुर घर्तीको उपस्थितिमा दुई पक्षबिच भएको भद्र सहमतिअनुसार एमालेले तिनाउमा जित हासिल गरेको अवस्थामा समर्थनमा आएका स्वतन्त्र उम्मेदवारहरूलाई कार्यपालिका सदस्यमा मनोनयन गर्ने बताइएको छ ।

उक्त सहमतिपछि छोटो प्रतिक्रिया जनाउँदै एमालेको तर्फबाट गाउँपालिका प्रमुख पदका उम्मेदवार प्रेम श्रेष्ठले तिनाउमा एमालेको निश्चित निश्चित भएको दाबी गरे ।

यसअघि यहाँ एमालेले अध्यक्ष,उपाध्यक्षसहित बहुमत सदस्य जितेको थियो । सहमतिमा एमालेलाई सघाउने समूहबाट कार्यपालिकामा मनोनीत गर्ने सहमति भएको छ । पाल्पामा एमालेबाहेकका सबै दलहरूको गठबन्धन रहेको छ ।

तिनाउमा माओवादीले अध्यक्षसहित २ वडाध्यक्ष तथा कांग्रेसले उपाध्यक्षसहित ४ वडाध्यक्ष दिने गरी गठबन्धन भएको छ ।

तर कांग्रेसका सबै वडा तथा गाउँ सभापतिले माओवादीलाई नेतृत्व बुझाएको भन्दै सामूहिक राजीनामा बुझाएका छन् ।