उम्मेदवारी रद्दपछि समानुपातिकको बन्द सूचीमा हट्यो नाम, निर्वाचन आयोगमा उजुरी

कैलाली । आसन्न स्थानीय तह निर्वाचनका लागि धनगढी उपमहानगरपालिकाको उपप्रमुखमा उम्मेदवारी दिएकी नेपाल परिवार दलकी विष्णुकुमारी विकको उम्मेदवारी रद्द भएको छ ।

समानुपातिकको बन्द सूचीमा नाम समावेश भएकाले उनको उम्मेदवारी रद्द भएको मुख्य निर्वाचन अधिकृत एवं जिल्ला न्यायाधीश जयानन्द पनेरुले जानकारी दिए। उम्मेदवारी रद्द भइसकेपछि बन्द सूचीबाट पनि नाम हटाउन लगाएको बताइएको छ ।

‘हिजो साँझसम्म उहाँको नाम समानुपातिकको बन्द सूचीमा भेटिएपछि उम्मेदवारी रद्द गरिएको थियो’, उनले भने, ‘अहिले उहाँको नाम बन्द सूचीबाट पनि हटाइएको छ ।’

उपप्रमुख उम्मेदवार बिकले निर्वाचन आयोगमा निवेदनसमेत दिएकी छिन् । उनको निवेदनमाथि छानबिन भइरहेको पनेरु बताउँछन् ।
‘हामीमार्फत निवेदन निर्वाचन आयोगमा पुगेको छ’, पनेरुले भने, ‘केन्द्रबाट जस्तो निर्देशन आउँछ, हामी त्यहीअनुसार अघि बढ्छौँ ।’