सिन्धुलीमा कांग्रेस सम्पर्क कार्यालय र सवारीसाधनमा तोडफोड, ७ जना घाइते

काठमाडौं । सिन्धुलीको दूधौली नगरपालिका–२ भलुवाहीस्थित नेपाली कांग्रेसको सम्पर्क कार्यालयमा बिहीबार राति अज्ञात समूहले आक्रमण गरेको छ । आक्रमणमा परी सात जना कांग्रेस कार्यकर्ता घाइते भएका छन् ।

आक्रमणमा परी कमल भुजेल, रञ्जित कुँवर, सन्तोष भुजेल, पेशल भुजेल, सरोज धामी, मण्डु थापा र दिनेश धामी घाइते भएका छन् ।

आक्रमणमा निर्वाचन प्रचारप्रसार गर्न प्रयोग गरिएका करिब एक दर्जन सवारीसाधनमा तोडफोड भएको गठबन्धनको तर्फबाट वडा अध्यक्ष उम्मेदवार जीतबहादुर भुजेलले बताए । अज्ञात समूहले बिहीबार राति १२ बजेतिर एक्कासी आक्रमण गरेको भन्दै घटनामा संलग्नलाई तत्काल कारबाही गर्न कांग्रेस दुधौलीले माग गरेको छ ।

शंकास्पद दुई जनालाई नियन्त्रणमा लिएको जिल्ला प्रहरी कार्यलय सिन्धुलीका डीएसपी मनोजकुमार लामाले जानकारी दिए । उनका अनुसार घाइतेहरुको अवस्था सामान्य रहेको छ । घटनामा संलग्न अन्यको खोजी भइरहेको र घटनाका सम्बन्धमा थप अनुसन्धान भइरहेको प्रहरीले जनाएको छ ।