देउवालाई कर्ण मल्लको जवाफ- दोस्रोपटक राजनीतिक घर र मनबाट निकाल्नुभएकोमा धन्यवाद

काठमाडौं । प्रधानमन्त्री शेरबहादुर देउवाको गृहजिल्ला डडेलधुरा पूर्वसभापति कर्ण मल्ल केहीदिनअघि पार्टी कारबाहीमा परेका थिए । १४ औं महाधिवेशनबाट असन्तुष्ट मल्ल आसन्न स्थानीय तह निर्वाचनमा आफ्नो समूहलाई नेपाली कांग्रेस (वीपी) का नामले एमालेसँग तालमेल गरेर अघि बढाएका थिए । त्यसपछि कांग्रेसले उनलाई साधारण सदस्य नरहने गरी पार्टीबाट निष्कासन गरेको थियो ।

त्यसैको जवाफमा आज मल्लले सामाजिक सञ्जाल फेसबुकमा देउवालाई लक्षित गरी ‘परम आदरणीय दाजु साष्टाङ्ग प्रणाम’ भन्दै सम्बोधन गरेर ‘मेरा कारण हजुरले पाउनु भएको पीडाका लागि क्षमा दिनु होला ।’ भनी स्टाटस लेखेका छन् ।

नेता मल्लले ‘मलाई दोस्रो पटक राजनितीक घर र हजुरको मनबाट निकाल्नु भएकोमा स-धन्यवाद आभार व्यक्त गर्दछु ।’ भनेर उल्लेख गरेका छन् ।

कारबाहीपछि आफू पीडामा रहेको उल्लेख गर्दै उनले न्यायका लागि जनतामा जाने बताएका छन् । ‘म अब पीडाकै बीचबाट तपाईंबाट प्रताडित साथीहरूसँगै न्यायका लागि देवरुपी जनताका बीचमा जादैछु,’ मल्लको भनाइ छ ।

मल्ललाई पार्टीबाट कारबाही भएको यो दोस्रो पटक हो । यसअघि २०५९ सालतिर उनलाई नेपाली कांग्रेस (प्रजातान्त्रिक) को साधारण सदस्यबाट नरहने गरी कारबाही गरिएको थियो । त्यतिबेला उनी दरबारनिकट भएर देउवाविरुद्ध गतिबिधिमा संलग्न भएका कारण कारबाही गरिएको पार्टी स्रोत बताउँछ ।