काठमाडौं मेयरमा महिला ल्याउने अवसरबाट नचुकौं, सूर्यमा भोट हालेका महिलाले पनि सोचौं : गगन थापा

काठमाडौं । नेपाली कांग्रेसका महामन्त्री गगन थापाले काठमाडौंका आम महिला मतदातालाई काठमाडौंको मेयरमा महिला ल्याउने अवसरबाट नचुक्न आग्रह गरेका छन् ।

कांग्रेसका तर्फबाट काठमाडौं महानगरको मेयरका उम्मेदवार सिर्जना सिंहको ‘संकल्प पत्र’ सार्वजनिक कार्यक्रमलाई सम्बोधन गर्दै उनले यस्तो बताएका हुन् ।

‘अघिल्लो पटक सूर्यमा भोट हालेको महिलाले पनि सोच्नुस् लडाइँ घरभित्र पनि छ । श्रीमान्‌सँग छ छोरासँग छ । महिलाको लडाइँ सजिलो छैन्,’ उनले भने, ‘राजधानीको मेयरको ठाउँमा महिला मेयर भएको कल्पना गरौं त । अघिल्लो पटक सूर्यमा हाल्नुभो भोलि पनि हाल्नु होला । तर, यसपटक महिलालाई जिताउँनुस् ।’ उम्मेदवार सिंहको आँट र साहस हेरेर मतदान गर्न उनले आग्रह गरे ।

उम्मेदवार सिंह गणेशमान सिंहको बुहारी, प्रकाशमान सिंहको श्रीमतीमात्र भन्दा अन्याय हुने बताउँदै महामन्त्री थापाले उनी महिला आन्दोलनको अगुवा भएको बताए ।