बराहक्षेत्रका अध्यक्षसँगै अधिकांश पदाधिकारीले छाडे माओवादी, गठबन्धनप्रति असन्तुष्टि

इटहरी । सुनसरीको बराहक्षेत्र नगरपालिकाका माओवादी अध्यक्ष कमलबहादुर कटवालले गठबन्धनप्रति असन्तुष्टि जनाउँदै पदबाट राजीनामा दिएका छन् । उनले पत्रकार सम्मेलनमार्फत माओवादी त्यागेको घोषणा गरेका हुन् ।

माओवादी त्यागेको घोषणा गर्दै उनले भने– माओवादी दलाल, पुँजिपति र नोकरशाही प्रवृत्तिको घेराबन्दीमा परेको छ । जसकारण अब माओवादीमै रहनसक्ने अवस्था रहेन ।

स्थानीय चुनावमा माओवादीको शक्तिशाली जनाधार रहेको क्षेत्रसमेत छोड्नु परेको भन्दै उनले असन्तुष्टि पोखेका छन् ।

बराहक्षेत्रमा यसअघि पनि थुप्रै माओवादी नेता कार्यकर्ताले पार्टी छाडिसकेका छन् ।

वडा नम्बर १ मा अध्यक्षको टिकट नपाएका रन्जित लोहनी, इन्चार्ज प्रकाश राई, सचिव निमेश किराँती, उपाध्यक्ष गंगामाया नेपाली, सहसचिव भीम लकान्द्री, कोषाध्यक्ष मन्दिरा कार्की, सदस्यहरु खगेन्द्र कार्की र रामबहादुर विस्टले पनि राजीनामा दिएका छन् । लोहनी र विस्टले स्वतन्त्र उमेदवारीसमेत दिएका छन् ।