आमाछोदिङमोको अध्यक्षमा एमालेका फुर्पु तामाङको उम्मेदवारी कायम, रद्द गरिएको सूचना बदर

रसुवा । निर्वाचन आयोगको पत्रपछि रसुवाको आमाछोदिङमो गाउँपालिकाको निर्वाचन अधिकृत कार्यालयले एमालेको अध्यक्ष उम्मेदवार कायमै राखेर यसअघिको सूचना सच्याएको छ ।

मंगलवार साँझ निर्वाचन मितिले आयोगको सोही पत्र बमोजिम मनोनयन पत्र दर्ता भएको उम्मेदवारहरूको संशोधित नामावली प्रकाशन गर्दा एमालेबाट उम्मेदवारी दिएका फुर्पु सिंगी तामाङको नाम कायम गरेको हो ।

सोमवार उम्मेदवारी दर्ता गराएका तेम्ब्रेल तामाङ तत्कालीन नयाँ शक्ति पार्टीबाट समानुपातिक सूचीमा रहेको पाइएपछि तत्कालै फुर्पुको उम्मेदवारी एमालेले कायम गरेको थियो ।

तर निर्वाचन अधिकृत शान्ति प्रसाद लुइँटेलले यसअघि नै एमालेको नामबाट राजश्व भौचर काटिएको भन्दै दुवै उम्मेदवारी रद्द भएको सूचना प्रकाशित गरेका थिए । त्यसका विरुद्ध एमालेले उजुरी दिएको थियो ।

आयोगले उजुरी जाँचबुझ गरी निर्णय गर्नुपर्ने समयभित्र जाँचबुझ गरेपछि मात्र मनोनयन पत्र स्वीकृत एवम् खारेजी सम्बन्धी निर्णय लिनुपर्ने भन्दै पत्र पठाएको थियो ।