जसपाबाट धनगढी उपमहानगरपालिकाको प्रमुखमा ऐर र उपप्रमुखमा राना थारु

कैलाली । जनता समाजवादी पार्टी (जसपा) ले धनगढी उपमहानगरपालिकाको मेयर र उपमेयरमा उम्मेदवारको टुङ्गो लगाएको छ ।

केही समय अघि गठबन्धनबाट बाहिरिएको जसपाले धनगढीको मेयरमा कवीन्द्र ऐर र उपमेयरमा नन्दकली राना थारुलाई उम्मेदवार बनाएको छ ।

शनिवार धनगढीमा पत्रकार सम्मेलनको आयोजना गर्दै जसपाले ३० वैशाखमा हुने स्थानीय तहको निर्वाचनमा ऐर र राना थारुलाई उम्मेदवार बनाउने निर्णय भएको जानकारी दिएको हो ।

सुदूरपश्चिम प्रदेश सरकार पुनर्गठन हुँदा आफूहरूलाई वास्ता नगरेको भन्दै जसपाले गठबन्धनमा नरहने प्रस्ट पारिसकेको थियो । जसपाले लोकतान्त्रिक समाजवादी पार्टी (लोसपा), नेपाल लोकतान्त्रिक पार्टी र संघीय लोकतान्त्रिक राष्ट्रिय मञ्चसँग तालमेल गर्ने निर्णय गरिसकेको छ ।

अहिले सम्म अन्य तीन दलले कुनै पनि उम्मेदवार सार्वजनिक गरेको छैन ।