यस्तो छ एमालेको नयाँ पार्टी कार्यालय (तस्बिर/भिडिओ)

काठमाडौं । थापाथलीबाट नेकपा एमालेको पार्टी मुख्यालय आजदेखि औपचारिकरुपमा च्यासलस्थित तुल्सीलाल स्मृति भवनमा सर्दैछ । थापाथलीमा भाडामा रहेको पार्टी कार्यालय आजदेखि आफ्नै भवनमा सर्न लागेको हो ।

लेलिनजयन्ती एवम् नेकपा एमाले स्थापना दिवसको अवसर पारेर सर्न लागेको एमाले मुख्यालय भव्य एवम् प्रविधिमैत्री बनाइएको छ ।

कार्यालयको भुइँतलामा कार्यालय सचिवको कार्यकक्ष र स्वागत कक्ष निर्माण गरिएको छ । त्यस्तै पहिलो तलामा केन्द्रीय सल्लाहकार परिषद्, संगठन विभाग, प्रचार तथा प्रकाशन विभाग, पराराष्ट्र मामिला विभाग प्रमुखसँगै महासचिव र अध्यक्षको कार्यकक्ष निर्माण गरिएको छ । सोही तलामा पुष्पलाल स्मृति हल पनि रहेको छ ।

त्यस्तै दोस्रो तलामा केन्द्रीय विभागहरु, सचिवको क्याविन, निर्वाचन आयोग, लेखा आयोग, अनुशासन आयोगका प्रमुखसँगै वरिष्ठ उपाध्यक्ष, उपाध्यक्षहरु, उपमहासचिवका क्याविनसहितको कार्याकक्ष बनाइएको छ ।

फराकिलो पार्किङ र बगैंचासहितको एमालेको नयाँ पार्टी कार्यालय निकै भव्य र आकर्षक देखिन्छ ।