नेपाल स्काउटले युवामा देशप्रेम जगाएको छ : राष्ट्रपति भण्डारी (भिडिओ)

काठमाडौं । राष्ट्रपति विद्यादेवी भण्डारीले नेपाल स्काउटको संगठित र सेवामूलक अभ्यासले नेपाली बालबालिका तथा युवामा देशप्रेम जागृत भइरहेको बताएकी छन् ।

विश्व स्काउट संगठन एसिया प्रशान्त क्षेत्रले प्रदान गरेको ‘मेधावी स्काउट सुशोभन समारोह’मा सम्बोधन गर्दै उनले यस्तो बताएकी हुन् ।

‘स्काउटले बालबालिका तथा युवामा समाजसेवाको भावना जागृत गर्दै देशप्रेम जगाउन, सार्वजनिक स्वास्थ्य प्रवर्धन गर्न र विकृतिविरुद्ध चेतना अभिवृद्धि गर्न निर्वाह गरेको भूमिका प्रशंसनिय छ,’ उनले भनीन् ।

राष्ट्रको सेवा तथा समाजको उत्थानका लागि गठित नेपाल स्काउटले हाम्रो मुलुकका जागरुक बालबालिका तथा युवाहरूमा स्वयंसेवी भाव जागृत गराएको छ । अनेकौ चुनौतीहरूको सामना गर्दै आफ्ना योजना तथा उद्देश्यहरुलाई थप परिस्कृत र सुदृढ तुल्याएर देशव्यापी बनाउन नेपाल स्काउटले देखाएको सुझबुझ र सक्रियताको उनले प्रशंसा गरिन् ।

उनले भनीन्, ‘महिला हिंसाविरुद्धको अभियान, बालिका तथा किशोरी सशक्तिकरण, लागूऔषध दुर्व्र्यसनविरुद्धको जागरण तथा विभिन्न विपद् व्यवस्थापनमा स्वयमसेवक परिचालन गरी अग्रमोर्चाका कार्य गर्दै आएकोमा सह्राहना व्यक्त गर्दछु ।’