नेपाल बास्केटबल लिग जेठमा हुने (भिडिओ)

काठमाडौं । तेस्रो संस्करणको नेपाल बास्केटबल लिग (एनबिएल) जेठमा हुने भएको छ ।

नेपाल बास्केटबल लिग प्राइभेट लिमिटेडको आयोजनामा पुरुष तर्फको लिग जेठ ७ देखि सुरु हुने भएको हो । त्यस्तै महिला तर्फ लिग भने जेठ १८ बाट सुरु हुने आयोजकले जनाएको छ ।

लिगमा प्लेअफका खेलहरू असर ३२ बाट सुरु हुने र फाइनल साउन ७ मा खेलाइनेछ । दुई महिनासम्म सञ्चालन हुने एनबिएल नेपालकै ठुलो बास्केटबल लिग हो ।

लिग राउन्ड रोबिनको आधारमा होम एण्ड अवे गरेर खेलिने छ । शीर्ष चार टिमले प्लेअफमा स्थान बनाउने छन् ।

प्रतियोगितामा पुरुष तर्फ ५६ र महिलातर्फ २० लिग खेलहरू हुने छन् । लिगमा पुरुषतर्फ ६ टिमको सहभागिता रहने छ ।

टाइम्स इन्टरनेसनल क्लब, त्रिभुवन आर्मी क्लब, गोल्डेन गेट इन्टरनेसनल क्लब. रोयल बास्केटबल क्लब, बुढानीलकण्ठ नगरपालिका बास्केटबल क्लब र कीर्तिपुर बास्केटबल क्लबको सहभागिता हुने छ ।

महिला तर्फ नेपाल पुलिस क्लब, ललितपुर हाइ क्लब, रोयल बास्केटबल क्लब, आइएसएस नेपालको सहभागिता पक्का भएको छ भने एक टिमको निश्चित हुन बाँकी रहेको आयोजकले जानकारी गरेको छ ।

एनबिएल पुरुषको विजेताले २ लाख रुपैयाँ पुरस्कार प्राप्त गर्ने छन् भने महिलाको विजेताले १ लाख पाउने छन् ।

पुरुष तर्फ दोस्रो हुने टिमले १ लाख र महिला तर्फ दोस्रो हुनेले ५० हजार पाउने आयोजकको भनाई छ ।