इटहरी मेयरमा जसपा पूर्वनेताले गरे स्वतन्त्र उम्मेदवारी घोषणा

इटहरी । जसपाका पूर्वकेन्द्रीय सदस्य पदम अधिकारीले इटहरी उपमहानगरपालिकाको मेयर पदमा स्वतन्त्र उम्मेदवारी दिने घोषणा गरेका छन् ।

वैशाख ३० को स्थानीय चुनावका लागि इटहरीको मेयरमा उम्मेदवारी घोषणा गर्ने उनी पहिलो व्यक्ति हुन् ।

उम्मेदवारी घोषणा गर्दै उनले भने, ‘पञ्चायती संस्कृतिको निरन्तरमा हो दलतन्त्र ।’

अधिकारीले एमसीसी अनुमोदनपछि नेपालको राष्ट्रियतामा कालो बादल मडारिएको तर्क गरेका छन् । इटहरीमा अल्पकालीन, मध्यकालीन र दिर्घकालीन योजना बनाएर काम गर्ने उनको प्रतिबद्धता छ ।

अहिलेको चुनावी लोकतन्त्रले बहुमतलाई नसमेट्ने भएकोले चुनावी मोडल नै फेर्नुपर्नेमा उनको जोड छ ।

एमालेबाट राजनीति सुरू गरेका नेता अधिकारी पछिल्लो समयमा जसपामा थिए । उनी जसपा विभाजनपछि लोसपासँग जोडिएका थिए । तर, सक्रिय भनेनन् ।