ओलीको आरोप- चोभारको बन्दरगाह शिलान्यासमा कांग्रेसले मलाई तीनपटक रोक्न खोजेको थियो (भिडिओ)

काठमाडौं । नेकपा एमालेका अध्यक्ष केपी शर्मा ओलीले प्रधानमन्त्री शेरबहादुर देउवाले मंगलबार उद्घाटन गरेको चोभार सुख्खा बन्दरगाहको शिलान्याश गर्न कांग्रेसले तीनपटक रोक्ने प्रयास गरेको आरोप लगाएका छन् ।

तत्कालीन प्रधानमन्त्री केपी शर्मा ओलीले २०७५ माघ ३ गते बन्दरगाह शिलान्यास गरेका थिए ।

२०७२ को भूकम्पबाट क्षति भइ पुन:निर्माण गरिएको भक्तपुरको सिपाडोलस्थित शान्ति निकेतन माध्यमिक विद्यालय भवन उद्घाटन गर्दै अध्यक्ष ओलीले कांग्रेसले निर्माण गर्न अवरोध गरेको उक्त बन्दगाह एमालेको सरकारले नै निर्माण सम्पन्न गरेको र अहिले प्रधानमन्त्री देउवाले उद्घाटन गरेको बताएका हुन् ।

कांग्रेसको पटकपटक अवरोधपछि एमाले सरकारले बनाएको बन्दरगाह अहिले सञ्चालनमा आउनु सुखद रहेको ओलीको भनाइ थियो ।

‘एमाले सरकारले विकासका निकै काम गरेको र फेरि पाँच वर्ष सरकारमा बसेपछि शिलान्यास र उद्घाटनको कामले तीव्रता लिनेछ’, ओलीले भने ।

ओलीले सत्तागठबन्धनलाई कुहिएको गठबन्धनको संज्ञा दिए ।

‘कुहिएको गठबन्धन झरेपछि फेरि मुलुकको विकासको बाटोमा अघि बढ्नेछ । परमादेशपछि बनेको वर्तमान सरकारका कारण मुलुकको विकासको काम नै अवरुद्ध भएको छ’, उनको जिकिर थियो ।