संसदीय समिति नबनाइ सकियो कांग्रेस बैठक

काठमाडौं । नेपाली कांग्रेसको केन्द्रीय समिति बैठक केही बेरअघि सकिएको छ । बैठकले संसदीय समिति भने गठन गरेन । विधानमा भएबमोजिम गठन गर्ने भनेर तत्काललाई टुंग्याइएको एक नेतालाई बताए ।

सभापति एवं प्रधानमन्त्री शेरबहादुर देउवा भारतबाट फर्केपछि संसदीय समिति र अनुशासन समिति बनाउने निर्णय भएको छ ।

बैठकको मुख्य एजेण्डाका रूपमा संसदीय समिति गठन रहेपनि आसन्न निर्वाचनमा चुनावी तालमेल गर्ने वा नगर्ने भन्ने विषयले बैठकमा बढी प्राथमिकता पायो ।

नेपाली कांग्रेसको १४ औं महाधिवेशनमा सभापतिको निकटतम प्रतिस्पर्धी रहेका डा. शेखर कोइरालालाई संसदीय समितिमा नराख्न सभापति शेरबहादुर देउवामाथि दबाब बढेको थियो ।

संस्थापन पक्षका अधिकांश नेताहरूले कोइरालाबिनाकै संसदीय समिति गठन गर्न दबाब दिएका थिए ।

कांग्रेसको विधानमा केन्द्रीय समितिका पदाधिकारीबाहेक केन्द्रीय सदस्यमध्येबाट ११ जना संसदीय समितिमा रहने प्रावधान छ ।