कांग्रेस बैठक चुनावी गठबन्धनकै पक्षमा, निर्णय अधिकार भने तलै दिइनुपर्छ : प्रदेश १ सभापति थापा

काठमाडौं । नेपाली कांग्रेस प्रदेश १ का सभापति उद्धव थापाले जारी कांग्रेस केन्द्रीय समिति बैठकमा चुनावी तालमेलको निर्णयको पल्ला भारीतर्फ अघि बढेको बताएका छन् ।

बैठक चलिरहँदा सानेपामा सञ्चारकर्मीसँग थापाले भने, ‘बैठकमा चुनावी गठबन्धन गर्ने परिदृश्य देखिएको छ । जुन आवश्यक पनि छ । विधिको शासनलाई स्थापित गर्न एक पटक यो चाहिन्छ पनि ।’

तर, गठबन्धनको अधिकार तल्ला तहहरूलाई दिनुपर्ने विषयमा बहुसंख्यक नेताहरूको धारणा आइरहेको पनि उनले जानकारी दिए । थापाले भने, ‘अधिकार नै दिउँ भन्ने छ । स्थानीय तहले नै छलफल गरेर निर्णय गर्ने भन्ने छ विषयमा छलफल चलिरहेको छ ।’

शुक्रबारदेखि बसेको केन्द्रीय समिति बैठकको दोस्रो दिन आज पनि नेताहरूले गठबन्धबारे धारणा राखिरहेका छन् । सभापति शेरबहादुर देउवा र उनीपक्षीय नेता चुनावमा एमालेविरुद्ध तालमेल गरेरै जानुपर्ने पक्षमा छन् ।

नेता शेखर कोइराला पक्ष भने गठबन्धन गर्दा गर्दै कांग्रेस बिलाएर जाने चिन्ता जनाएका छन् । आफ्नो तागतमा चुनाव भिड्नुपर्ने उनीहरूको जोड छ ।