रिपोर्टस क्लबमा गठबन्धनका नेता : तीनवटै चुनावमा तालमेल गर्ने दाबी

काठमाडौं । सत्तारुढ गठबन्धनमा रहेका दलका नेताहरूले स्थानीयदेखि संसदको निर्वाचनसम्मै चुनावी तालमेल हुने दाबी गरेका छन् ।
रिपोर्टस क्लबले बुधबार आयोजना गरेको साक्षात्कार कार्यक्रममा उनीहरूले गठबन्धन आफूहरूको बाध्यता भएको जिकिर गरे ।

नेकपा (एकीकृत समाजवादी) का स्थायी कमिटी सदस्य सोमप्रसाद पाण्डेले आगामी तीनै तहको निर्वाचनमा पाँच दलबीच गठबन्धन हुने बताए । नेपाली जनताको भावनाअनुसार राजनीतिक स्थिरता ल्याउनको लागि गठबन्धन तोड्न नहुने उनको भनाइ छ ।

नेपाली कांग्रेसका नेता डा. रणबहादुर रावलले अहिले पनि पाँच दलीय गठबन्धनको आवश्यकता रहेको भन्दै निर्वाचनमा पनि गठबन्धन गरेर अघि बढ्ने बताए । गठबन्धन गरेपछि विश्वासका साथ सबै दल अघि बढ्नुपर्नेमा रावलको जोड छ ।

नेकपा (माओवादी केन्द्र) का नेता हिमाल शर्माले अहिले पनि नेपाली राजनीतिमा सहमति, सहकार्य र एकता हुने कुरा स्वाभाविक नै भएको बताए । सत्ता गठबन्धनबीच स्थानीय तहको निर्वाचनमा सहकार्य गर्नेबारे सकारात्मक रूपमा छलफल चलिरहेको उनको भनाइ छ ।

त्यस्तै जनता समाजवादी पार्टी, नेपालका नेता नवराज सुवेदीले सबै तहमा पाँच दलीय गठबन्धनबीच चुनावी तालमेल र गठबन्धन हुने दाबी गरे ।

स्थानीय तहको निर्वाचनको निम्ति आफ्नो पार्टीको तर्फबाट यसको तयारी पर्याप्त रूपले गरिरहेको पनि सुवेदीले बताए ।