ओखलढुंगाकाे नवलपुर–घोराखोरी सडक निर्माण भएपछि राजधानीको दूरी छोटियो
![](https://www.nepalpress.com/wp-content/uploads/2020/11/nepalpress-logo-n.png)
![](https://www.nepalpress.com/wp-content/uploads/2022/03/20190101_1724540.jpg)
ओखलढुंगा । ओखलढुंगाको चम्पादेवी गाउँपालिकास्थित नवलपुर–चिप्लिङ–जल्किनी हुँदै घोराखोरी जोड्ने सडक निर्माण पछि काठमाण्डौंको दुरी छोटिएको छ । सडक निर्माण भएसँगै सो क्षेत्रका बासिन्दालाई राजधानी आवतजावत गर्ने दूरी छोटिएको हो ।
करिब ३० किलोमिटर लामो सडक निर्माण भएसँगै घोराखोरीबाट काठमाडौँ ५ घण्टामै पुग्न सकिने भएको छ । याे सडक निर्माण भए सँगै यहाँका स्थानीयले रामेछापकाे साँघुटार- रामेछाप हुँदै मन्थलीकाे सडक प्रयाेग गर्नु पर्ने बाध्यता हटेकाे छ । भौगोलिक विकटताका बाबजुद सडक निर्माण सम्पन्न भएको र केही ठाउँमा निकै मेहनत गरेर बक्स कटिङ समेत गरिएको गाउँपालिका अध्यक्ष नवराज केसीले बताए ।
अध्यक्ष केसीको सक्रियतामा सडक जोडिएपछि सदियौँ देखि ढाकर बोकेर भरिया हिँड्ने रुटमा सडक निर्माण भएपछि स्थानीय हर्षित भएका छन् । सो सडक चम्पादेवी गाउँपालिकाका नागरिक मात्रै नभएर जिल्लाको लिखु र खिजीदेम्बा गाउँपालिकाका साथै सोलुखुम्बुका नागरिकलाई समेत प्रयोग गर्न सहज भएको छ ।
नवलपुरमा निर्माणाधिन पक्की पुल केही महिनामा निर्माण सम्पन्न हुने निश्चित भएपछि यस सडकले यहाँका नागरिकलाई काठमाण्डौंको दुरी छोटो बनाएको छ ।