प्रचण्डको प्रष्टोक्ति– एमालेमा अहंकार र निषेधबाहेक केही छैन, तत्काल सहकार्य हुन्न

विराटनगर । नेकपा माओवादी केन्द्रका अध्यक्ष पुष्पकमल दाहाल (प्रचण्ड)ले तत्काल आउने चुनावसम्म एमालेसँग सहमति र सहकार्यको सम्भावना नरहेको प्रष्ट पारेका छन् ।

विराटनगरमा पत्रकारहरुसँग कुरा गर्दै अध्यक्ष प्रचण्डले आफूहरु राष्ट्रिय स्वाधीनको जटिल र संवेदनशील विषयमा सहमति हुन्छ कि भनेर केपी ओलीलाई भेट्न जाँदा असाध्यै नकारात्मक रुपमा प्रस्तुत भएकाले सहकार्यको सम्भावना नरहेको बताए ।

अध्यक्ष प्रचण्डले भने,’हामी नारायणकाजीसहित केही साथीहरु लिएर केपीलाई भेट्न म आफैं गएको थिएँ । तर कहिँ कतै एमालेमा सकारात्मक केही देखिएन । नकारात्मक,निषेधात्मक र अहंकारबाहेक केही छैन । त्यसैले अहिले एमालेको केपी गुटसँग तत्काल कुनै सहमति सहकार्य हुने सम्भावना छैन ।’

प्रचण्डले कांग्रेससँग भने गठबन्धनको प्रयास हुने तर माओवादी एक्लै आफ्नै बुतामा चुनाव लड्ने प्रष्ट पारे । विभिन्न स्थानीय तहका जनप्रतिनिधि र नेताहरु एमाले प्रवेश गरे पनि उनीहरु पहिले नै खुट्टा उचालेर बसकाले केही फरक नपर्ने उनले बताए ।