कांग्रेसको चुनावी अभियान : सबै जिल्लामा केन्द्रीय सदस्य खटाइने (भिडिओ)

काठमाडौं । नेपाली कांग्रेसले एकमहिने चुनावी अभियानमा केन्द्रीय सदस्यहरूलाई प्रतिनिधि बनाएर खटाउने भएको छ ।

कांग्रेसले आयोजना गरेको पत्रकार सम्मेलनमा ‘घरघर जाउँ कांग्रेस जिताऔं’ अभियानअन्तर्गत सो पार्टीले ७७ जिल्लामा ७७ जना केन्द्रीय सदस्यहरूलाई प्रतिनिधिका रूपमा पठाउने जानकारी गराएको हो ।

कांग्रेस प्रवक्ता प्रकाशशरण महतले एमसीसीका बारेमा छरिएको भ्रम निवारण गर्ने, केपी ओली नेतृत्वको सरकारले तीन वर्षमा गरेका असंवैधानिक काम र भ्रष्टाचार प्रकरणका विषयमा जानकारी गराउने बताए ।

प्रदेश, जिल्ला र पालिकास्तरका कमिटीहरूलाई संघका कार्यक्रम प्रभावित नहुने गरी घरदैलो अभियान सञ्चालनका लागि कार्ययोजना बनाएर अगाडि बढ्न निर्देशन दिएको छ ।

प्रवक्ता महतले सरकारले गरेका काम र पार्टीले खेलेको भूमिकाका विषयमा जनतालाई जानकारी गराउन सामाजिक सञ्जाल, स्थानीय सञ्चारमाध्यमको प्रयोग गरिने पनि बताए ।

उनले शेरबहादुर देउवा नेतृत्वको सरकारले ७० प्रतिशत नागरिकलाई कोरोनाविरुद्धको खोप दिइसकेको बताए ।

यस्तै सम्बन्धित जिल्ला र पालिकामा आवश्यक विकास निर्माणका आवश्यकताहरूलाई जनताको चाहानाअनुसार कार्ययोजना तय गरिने उनले बताए ।

युवाहरूलाई प्रशिक्षण दिँदै मतदानका लागि अभिप्रेरित गरिने उनले बताए ।

‘जनता के सुनाउन चाहन्छन् के अपेक्षा राख्छन्’ भन्ने नाराका साथ अन्तरक्रिया गरिने पनि महतले जानकारी दिए ।

कांग्रेसले एमसीसीको बारेमा स्पष्ट पार्न र भ्रम चिर्न पुस्तक नै छपाएर गाउँ पुर्‍याउँदैछ ।