नेकपा एस जान एमाले छाडेका बलेफी गाउँपालिका अध्यक्ष क्षेत्री कांग्रेस प्रवेश गर्दै

सिन्धुपाल्चोक । जिल्ला अध्यक्ष हुन नपाएपछि नेकपा एमाले छाडेका सिन्धुपाल्चोकको बलेफी गाउँपालिकाका अध्यक्ष केदार क्षेत्री नेपाली कांग्रेसमा प्रवेश गर्ने भएका छन् । क्षेत्रीसहित उनका भाइ व्यावसायी कृष्ण क्षेत्री पनि भोलि कांग्रेस प्रवेश गर्न लागेका हुन् ।

एमालेमा व्यक्तिवादी प्रवृत्ति हाबी भएको भन्दै क्षेत्रीले केही समयअघि नेकपा एमाले छाडेको घोषणा गरेका थिए । क्षेत्री एमाले जिल्ला अध्यक्षका दाबेदार थिए । जिल्ला अध्यक्षमा यसअघिका सचिव कमल नेपाल चुनिएपछि क्षेत्रीले एमाले छाड्ने घोषणा गरेका हुन् ।

एमाले छाडेपछि उनी नेकपा एसमा जाने चर्चा चलेको थियो ।

स्रोतका अनुसार नेपाली कांग्रेसले केदार क्षेत्रीलाई प्रदेशसभा निर्वाचनको र भाइ कृष्ण क्षेत्रीलाई गाउँपालिकाको टिकट दिने वचन दिएको छ ।

लामो समयदेखि एमालेका विभिन्न कमिटीमा रहेर काम गरेका क्षेत्री २०७४ सालको निर्वाचनमा बलेफी गाउँपालिकाको अध्यक्षमा निर्वाचित भएका थिए ।

सिन्धुपाल्चोकका अर्का नेता सुवास कर्माचार्य पनि एमाले केन्द्रीय सदस्य हुन नपाएपछि नेकपा एसमा लागेका छन् ।