माओवादीको केन्द्रीय समिति बैठक सर्‍याे

काठमाडौं । नेकपा (माओवादी केन्द्र)को केन्द्रीय समितिको बैठक केही समयलाई सरेको छ । बिहान ११ बजे बोलाइएको बैठक दिउँसो २ बजेसम्मलाई सरेको केन्द्रीय सदस्य रामप्रसाद सापकोटा ‘दीपशिखा’ले जानकारी दिए।

कार्यालय सचिव श्रीराम ढकालले गृहकार्य नसकिएको र प्रतिनिधिसभाको बैठक १ बजे भएकाले सारिएको जानकारी दिए ।

माओवादी केन्द्रको केन्द्रीय समितिको बैठक शुक्रबारदेखि सुरु भएको थियो । पदाधिकारी चयन, स्थायी समिति, पोलिटब्युरो गठन, केन्द्रीय सदस्यको कार्यविभाजन, स्थानीय चुनाव केन्द्रित अभियानको घोषणालगायतका एजेन्डामा बैठकले निर्णय लिनेछ ।

पदाधिकारी र अन्यमा गृहकार्य गर्ने भन्दै शनिबार बैठक राखिएको थिएन । सहमति जुटेमात्रै पदाधिकारी घोषणा गर्ने नत्र त्यसबिनै अघि बढ्ने तयारी छ ।

मुख्यगरी महासचिवमा धेरै दाबेदार भएपछि सहमतिमा पुग्न गाह्रो भइरहेको नेताहरुले बताएका छन्।