सदन बहिष्कार गरेर एमसीसी पारित गर्न खोजे विरोधमा उत्रिन्छु : श्रेष्ठ – Nepal Press

सदन बहिष्कार गरेर एमसीसी पारित गर्न खोजे विरोधमा उत्रिन्छु : श्रेष्ठ

काठमाडौं । नेकपा (माओवादी केन्द्र) का नेता नारायणकाजी श्रेष्ठले आफ्नो पार्टीले संसद बहिष्कार गरेर एमसीसी पास गर्न सहयोग पुर्‍याउने भन्ने खबर गलत भएको बताएका छन् ।

शुक्रबार एकीकृत समाजवादीले आयोजना गरेको खबरदारी सभामा श्रेष्ठले आफ्नो पार्टीले एमसीसीका विपक्षमा मतदान गरेर विफल पार्ने दाबी गरे ।

‘केही सञ्चारमाध्यममार्फत हाम्रो पार्टी एमसीसीमाथि मतदानका बेला संसद बहिष्कार गरेर पारित गर्न सहयोग गर्ने कुरा आएको छ । यसको खण्डन गर्न चाहान्छु । संसद बैठक बहिष्कार गर्ने वा अनुपस्थित हुने गर्दैन । विपक्षमा मतदान गर्छ र असफल पार्छ ’, उनले भने ।
श्रेष्ठले पार्टी र कुनै सांसदले अनुपस्थित भएर एमसीसी पारित गर्न सहयोग गरे आफू विरोधमा उत्रिने बताए । उनले भने , ‘जुन पार्टी वा नेताले संसदमा अनुपस्थित भएर एमसीसी पारित गर्न सहयोग गर्छ, म त्यसको विरोधमा उत्रिने छु ।’

आजै सामाजिक सञ्जालमार्फत सत्तारुढ गठबन्धनभित्र सहमतिको सम्भावना बढ्दै गएको भनिएपनि माओवादी नेता श्रेष्ठले यथास्थितिमा माओवादी एमसीसीको पक्षमा नउभिने प्रष्ट्याएका थिए ।


प्रतिक्रिया

Leave a Reply

Your email address will not be published. Required fields are marked *