पशुपतिमा गिद्दे नजर लाउनेको भलो हुँदैन : मन्त्री आले (भिडिओ)

काठमाडौं । संस्कृति, पर्यटन तथा नागरिक उड्डयन मन्त्री प्रेम आलेले पशुपतिनाथको धर्मशाला छिट्टै फिर्ता ल्याउने बताएका छन् । शिवरात्रिको तयारीबारे आयोजित पत्रकार सम्मेलनमा बोल्दै मन्त्री आलेले भारतका प्रधानमन्त्री नरेन्द्र मोदीले २५ करोड रकम दिएर निर्माण गरेको धर्मशाला विगतका प्रतिनिधिले बेच्ने काम गरेको बताए ।

उनले भने,‘आज हामीसँग धर्मशाला भइदिएको भए भारतबाट आएका साधु-सन्त बस्न पाउथे । बतासको अल्पकालीन आदेश खारेज भइसकेको छ । जसले पशुपतिमा गिद्दे नजर लगाउँछ उसको कहिले पनि भलो हुँदैन । हामी छिट्टै सम्पत्ति फिर्ता ल्याउछौं ।’

मन्त्री आलेले यस वर्षको महाशिवरात्रि भव्य सभ्य बनाउन कुनै कसर बाँकी नराख्न उपसमितिलाई निर्देशन दिएका छन् । उनले कुनै पनि ठाउँमा ढुंगा माटो फोहोर नराख्न निर्देशन दिए ।

मन्त्री आलेले भने,‘धर्मावलम्बीहरू आउँदा पानीको व्यवस्था, शौचालयको व्यवस्था होस् । जहाजहाँ अँध्यारो छ त्यहाँ लाइटिङको व्यवस्था होस् । पशुपतिको पर्खालमा चित्र बनाउनुहोस् भनेर भन्दै आएको छु । बन्दै गएको यसले सौन्दर्य झल्केको छ । मेला सम्पन्न गर्न एकदिनको जति सक्नुहुनुहुन्छ खट्नुस् ।’

उनले अहोरात्र सुरक्षा निकायलाई सहयोग गर्न आग्रहसमेत गरे ।