धनुषा कांग्रेस सभापतिमा कोइराला समूहबाट प्रसैला उम्मेदवार

जनकपुरधाम । नेपाली कांग्रेस धनुषाको सभापतिमा शेखर कोइराला समूहबाट दिनेश प्रसैला ‘यादव’ले उम्मेदवारी घोषणा गरेका छन् ।

जनकपुरधाममा पत्रकार सम्मेलन गरेर प्रसैलाले कांग्रेस जिल्ला सभापतिमा उम्मेदवारी दिने बताए । उनी शेखर कोइरालाको आधिकारिक उम्मेदवार भएको कांग्रेस सहमहामन्त्री बद्री पाण्डेले घोषणा गरे ।

प्रसैला पूर्वसांसद हुन् । उनले जिल्ला सभापतिमा जित्ने दाबी सहमहामन्त्री पाण्डेले गरेका छन् । उनका अनुसार केन्द्रीय अधिवेशनमा इतर पक्षमा ४० प्रतिशत मत आएको थियो । अहिले देउवा पक्ष आफैं विभाजित भएको छ ।

प्रसैलाले आफू मात्र जिल्ला सभापतिका लागि योग्य रहेको बताए । उनले आफू सभापति भएपछि धनुषाको चारवटै प्रतिनिधिसभा सिटमा कांग्रेसले जित्ने दाबी गरे ।

धनुषा सभापतिका लागि त्रिपक्षिय भिडन्त हुने भएको छ । यसअघि नै पार्टी सभापति शेरबहादुर देउवाको समूहबाट सन्तोष यादव र विमलेन्द्र निधिको समूहबाट योगेन्द्र पञ्जियार उम्मेदवारी घोषणा गरिसकेका छन् ।

यादव जिल्ला उपसभापति छन् भने पञ्जियार क्षिरेश्वरनाथ नगरपालिकाका मेयर हुन् ।