गृहमन्त्रीलाई एमाले अध्यक्ष ओलीको प्रश्न- प्रहरीमाथि ढुंगा हान्ने आदेश दिएको हो ? (भिडिओ)

काठमाडौं । पूर्वप्रधानमन्त्री एवम् नेकपा (एमाले) का अध्यक्ष केपी शर्मा ओलीले गृहमन्त्री बालकृष्ण खाणलाई फोन गरेर हिजो बानेश्वरमा प्रदर्शनबारे जिज्ञासा राखेका छन् । सोमबार कालु पाण्डेको समाधीस्थलमा आयोजित एक कार्यक्रमलाई सम्बोधन गर्दै ओलीले उक्त टेलिफोन संवादबारे जानकारी गराए ।

‘मैले आज गृहमन्त्रीलाई भने- तपाईं पुलिस किन सडकमा पठाउनुहुन्छ ?’ ओलीले भने, ‘कत्रो दुःख गरेर बाटो बनाएको छ, सरकारमा हुने क्रान्तिकारीहरूले भत्काएका छन् । कोही छैन यो देशमा नभत्काऊ भन्ने ? कस्तो सरकार हो ?’

ओलीले प्रदर्शनकारीबाट प्रहरी कुटिँदा पनि त्यसको प्रतिरक्षा गर्न किन आदेश नदिएको भने आफूले गृहमन्त्रीलाई प्रश्न गरेको बताए । उनले भने, ‘प्रहरी कुटाइ खाएर भागेको छ । २५ जना मान्छेले ढुंगा हानेको छ । डेढ सय प्रहरी पछाडि भाग्दै छ । केही पनि आदेश हुँदैन ।’

ओलीले थपे, ‘मैले गृहमन्त्रीलाई सोधेँ, ढुंगा हान्ने मात्रै आदेश थियो ? के आदेश थियो ?’ प्रहरी कुटिएको बारे पनि आफूले गृहमन्त्रीसँग बुझेको ओलीले जानकारी गराए । ‘मैले गृहमन्त्रीलाई सोधेँ प्रहरी किन कुटिए ? कति घाइते भए ?,’ उनले भने ।