फागुन २० गतेसम्म म्युजिक भिडिओमा काम नगर्ने पल शाहको निर्णय

काठमाडौं । पल शाह यतिबेला म्युजिक भिडिओमा सबैभन्दा व्यस्त अभिनेता हुन् । दिनहुँजसो उनका नयाँ-नयाँ म्युजिक भिडिओ युट्युवमा लन्च भैरहेका छन् ।

यस्तोमा आगामी फागुन २० गतेसम्म नयाँ म्युजिक भिडिओमा काम नगर्ने निर्णय उनले गरेका छन् । भिडिओ अफर लिएर पुग्ने निर्माता र निर्देशकलाई उनले फागुन २० सम्म काम नगर्ने भन्दै फर्काइरहेका छन् ।

उनले यस्तो निर्णय गर्नुु पछाडि चाहिँ फागुन १३ गते रिलिज हुने उनी अभिनित फिल्म ‘म यस्तो गीत गाउँछु २’को प्रदर्शन मुख्य कारण हो । निर्मात्री तथा नायिका पूजा शर्मा र निर्देशक सुदर्शन थापाको आग्रहमा पलले फिल्म प्रदर्शन अवधिभर म्युजिक भिडिओ नगर्ने निधो गरेका हुन् ।

यतिबेला पल, पूजा र सुदर्शन फिल्मको प्रचारप्रसारमा दौडधुप गरिरहेका भेटिन्छन् । बुधबार फिल्मले थारु र नेवारी भाषामा बनेका दुई प्रबद्र्धनमूलक भिडिओ लन्च गरे जहाँ पल र पूजा पनि पुगेका थिए ।