२५ वर्षपछि कमब्याक हुँदै धीरज राई : ‘लुकी लुकी आँखा तिमी’मा आँचलसँग सहकार्य

काठमाडौं । कुनैबेलाका ब्लकबस्टर पपगायक धीरज राई सांगीतिक कमब्याकको तयारीमा छन् । केही वर्षअघिसम्म ‘बुद्ध वाज बर्न इन नेपाल’ अभियान चलाएका गायक राई अहिले भने एक नयाँ गीत लन्च गर्ने तयारीमा छन् ।

उनको हिट गीत ‘लुकी लुकी आँखा तिमी’ अहिले पनि श्रोताको कानमा गुञ्जिने गरेको छ । गीत रिलिजको २५ वर्षपछि धीरजले अहिले यसको भिडिओ तयार पारेका छन् ।

ट्री इन्टरटेनमेन्टको निर्माणमा तयार भएको यो म्युजिक भिडिओ छायांकन सकिएको छ । माइकल चन्दले निर्देशन गरेको यो भिडिओमा आँचल शर्मा, राज र डेलविस समेत फिचर्ड छन् ।

साढे दुई दशकपछि यो गीतलाई ल्याउनुपर्ने कारणबारे धीरजले भने, ‘नेपाल टेलिभिजनमा खिचिएको धमिलो आवाज पनि दर्शकको मनमा अझै छ । अडियोमा परिवर्तन नगरि हामीले भिडिओ सुटिङ गरेका छौं । अहिलेको पुस्ताको दर्शकले यसलाई रुचाउने आशा छ ।’

इतिहास बोकेको गीतमा काम गर्न पाउँदा आफू गौरवान्तित महसुस गरेको आँचलले बताइन् । निमांण कम्पनीले यो गीतलाई दुई सातापछि इन्टरनेट रिलिजको तयारी गरेको छ ।