ईर्ष्याका कारण राम्रो कामको प्रचार नभएको प्रधानमन्त्रीको गुनासो (भिडिओ)

काठमाडौं । प्रधानमन्त्री एवम् नेपाली कांग्रेसका सभापति शेरबहादुर देउवाले कांग्रेसका नेता कार्यकर्ताले पार्टीको प्रचार कम गरिरहेको बताएका छन् ।

कांग्रेस नेता तथा पूर्वमन्त्री अर्जुननरसिंह केसीद्वारा लिखित पुस्तक ‘नेपाली कांग्रेसको संक्षिप्त इतिहास (सिद्धान्त तथा नीतिको परिचयसहित)’ को लोकार्पण गर्दै देउवाले पार्टीले राम्रो-राम्रो काम गरिरहेको भएपनि जस अरुलाई जाने ईर्ष्याका कारण पार्टीको प्रचार नगर्ने गरिएको बताए ।

उनले भने, ‘पार्टीको प्रचार हामीले कम गरेका छौँ । हामीले गरेका कामहरूको प्रचार कम गरेका छौँ । प्रचार भएपछि जस अरुलाई जान्छ भन्ने हामीलाई ईर्ष्या छ । पार्टीले गर्‍यो भनेर देशभरी भन्न सकिन्छ । पार्टीको प्रचार पुगेको छैन । पार्टीले गरेका राम्रा कुराहरु पुगेका पनि छैनन् । पार्टीले राम्रो कामहरू गरेको छ ।’

प्रधानमन्त्री देउवाले राष्ट्रहितको पक्षमा बोल्न कांग्रेस डराउन नहुने बताए ।