कार्चेनलाई मन्त्री बनाइएको विरुद्ध परेको रिटमा अदालतको कारण देखाऊ आदेश

सुर्खेत । कर्णाली प्रदेशका उद्योग, पर्यटन, वन तथा वातावरण मन्त्री छिरिङ डम्डुल लामा उर्फ कार्चेन लामाविरुद्धको रिटमा उच्च अदालतले कारण देखाऊ आदेश जारी गरेको छ ।

फौजदारी कसुरमा सजाय भोगेका व्यक्तिलाई मन्त्री बनाइएको भन्दै वीरेन्द्रनगर-३ कि विनिता बोगटीले सोमबार दायर गरेको रिटउपर सुनुवाइ गर्दै न्यायाधीश राजेन्द्र खरेलको एकल इजलासले कारण देखाऊ आदेश जारी गरेको हो ।

अन्तरिम आदेश माग गरिएकाले यहीँ फागनु १० गते छलफलका लागि बोलाउन आदेश भएको उप-रजिष्ट्रार सरोजनिधि वाग्लेले जानकारी दिए ।

मध्यपश्चिम विश्वविद्यालयअन्तर्गत कानून संकायकी विद्यार्थी बोगटीले दायर गरेको रिटमा नैतिक पतन देखिने फौजदारी कसुरमा सजाय पाएका व्यक्तिलाई मन्त्री पदमा नियुक्त गरिनु कानुनी राज्यको उपहास भएको उल्लेख छ ।