भ्यालेन्टाइन्स रिलिज : ‘किङ्स म्यान’ र ‘खिलाडी’ आजदेखि नेपाली फिल्म हलहरुमा

काठमाडौं । आज विश्वभर प्रेम दिवस अर्थात भ्यालेन्टाइन्स डे मनाइँदैछ । यो छेकोमा सोमबारदेखि दुई नयाँ फिल्म नेपाली हलहरुमा प्रदर्शनमा आएका छन् ।

हलिउड फिल्म ‘द किङ्स म्यान’ र भारतीय फिल्म ‘खिलाडी’ले आजदेखि प्रदर्शन थालेका हुन् । आइतबारदेखि हल खुलेपनि भ्यालेन्टाइन्स अवसरमा सोमबारदेखि फिल्म रिलिज भएका हुन् ।

म्याथ्यु भग निर्देशित फिल्म ‘द किङ्सम्यान’ स्पाइ, एक्सन र कमेडी जानरामा निर्माण भएको हो । किङ्सम्यान सिरिजको यो तेस्रो श्रृंखला कमिक बुक ‘द सेक्रेट सर्भिस’मा आधारित छ ।

राल्फ फिनिस, जेम्मा आर्टेटोन, राइस इफान्सको मुख्य भूमिका रहेको यो फिल्मका दुबै सिक्वेलले नेपाली बक्सअफिसमा राम्रो कमाइ गरिसकेका छन् । एप्पल इन्टरटेनमेन्टले यो फिल्मलाई रिलिज गरेको हो ।

आजै दक्षिण भारतीय तेलुगु फिल्म ‘खिलाडी’ पनि नेपाली हलमा प्रदर्शनमा आएको छ । रमेश बर्मा निर्देशित फिल्ममा रवि तेजा, अर्जुन सार्जा, उन्नु मुकन्दनको मुख्य भूमिका छ ।

‘चपली हाइट ३’, ‘कठ्पुतली’, ‘स्पाइडरम्यान : नो वे होम’ र ‘माइ हिरो अकाडेमिया : वर्ल्ड हिरोज मिसन’ पनि आइतबारदेखि नै प्रदर्शनमा आएका छन् ।